- ஜீவா சதாசிவம்

மலையக மக்களின் பிரச்சினை என்றவுடன் 'ஆயிரம் ரூபா' என்பதுதான் அர்த்தப்படுத்தப்பட்டுவிட்டுள்ள நிலையில், அதனையும் தாண்டிய இன்னுமொரு பிரச்சினை பற்றியும் பேசவேண்டிய காலம்தான் இது.

ஆயிரம் ரூபாவுக்கு அமைச்சரவைப் பத்திரம் சமர்ப்பிக்கப்பட்டுள்ளதுபோல மலையகப் பெருந்தோட்டத்துறையில் அமுலில் உள்ள தோட்ட சுகாதார முறைமையை அரசாங்கம் பொறுப்பேற்கும் வகையில் அமைச்சரவைப் பத்திரம் சமர்ப்பிக்க உள்ளதாக சுகாதார அமைச்சர் பவித்ரா வன்னியாராச்சி பாராளுமன்றில் தெரிவித்துள்ளார்.

அப்படியாயின் தோட்ட சுகாதார முறைமை என்ற ஒன்று நடைமுறையிலுள்ளது என்பதும் இதுவரையில் அரசாங்கத்தின் பொறுப்பில் மலையகப் பெருந்தோட்டப் பகுதியில் சுகாதார நடைமுறைகள் இல்லை என்பதும் தெளிவு.

அதனை யார் நடைமுறைப்படுத்துகிறார்கள் என்பதும் எழும்பும் வினா?. ஆயிரம் ரூபா விடயத்துக்கும் இதற்கும் உள்ள ஒற்றுமை என்னவெனில் இதனையும் அதே பிராந்திய கம்பனிகளே நடைமுறைப்படுத்துகின்றன என்பதாகும்.

இந்த தோட்ட சுகாதார முறைமை ( Estate Health Sector) வளர்ந்துவந்த  வரலாறு பெரியது. சுருக்கமாகச் சொன்னால்; இந்தியாவில் இருந்து தொழிலாளர்களை அழைத்துவந்தபோது அவர்களிடம் இருந்தான தொற்றுநோய்களைத் தவிர்ப்பதற்கு சொட்டுமருந்து கொடுப்பதற்கு உருவான முறைமை அப்படியே அடுத்த கட்டத்தை அடைந்து தோட்ட மருத்துவ முறைமையாக வளர்ந்துவிட்டது.

பெருந்தோட்டங்களை நிர்வகித்த நிறுவனங்களே அந்த மக்களின் சுகாதாரத்துறையையும் பொறுப்பாக ஏற்றுக் கொண்டனர். இலலங்கை சுதந்திரம் அடைந்த கையோடு இந்த மக்களின் வாக்குரிமை பறிக்கப்பட்டதால் அரச சேவைகள் எதிலுமே உள்வாங்கப்படவில்லை. சம்பளம் முதல் சுகாதாரம் வரை என சுருக்கமாக சொல்லலாம்.

பின்னர் குடியுரிமை என்றபெயரில் வாக்குரிமைக் கிடைக்கப்பெற்றாலும் அரச ஃ பொது சேவைகள் அந்த மக்களை வந்து சேரவில்லை. தோட்ட சுகாதார முறைமையை அரசாங்கத்தின் கீழ் கொண்டுவரும் பொருட்டு இதற்கு முன்னரும் இரண்டு அமைச்சரவைப் பத்திரங்கள் சமர்ப்பிக்கப்பட்டுள்ளன. 2006 ஆம் ஆண்டு நிமல் சிறிபால டி சில்வா சுகாதார அமைச்சராகவும் வடிவேல் சுரேஷ் பிரதி சுகாதார அமைச்சராகவும் இருந்த காலத்தில் சமர்ப்பிக்கப்பட்ட பத்திரத்தின் பேரிலேயே 44 தோட்ட வைத்தியசாலைகள் அரசினால் பொறுப்பேற்கப்பட்டன. எனினும் அதில் 22 அளவே இப்போது செயற்பாட்டில் உள்ளபோதும் ஏனையவை செயலற்று முடங்கின. அதற்கு பின்னர் வேறு வைத்திய நிலையங்களுக்காக அந்த அமைச்சரவைப் பத்திர தீர்மானம் பயன்படுத்தப்படாததோடு அந்த பத்திரமும் மாயமாகிவிட்டது.

2018   ராஜித்த சேனரத்ன காலத்தில் ஒரு அமைச்சரவைப் பத்திரம் சமர்ப்பிக்கப்பட்டு, அபிப்பிராயம் கோரலுக்காக ஏனைய அமைச்சுக்களுக்கு வழங்கப்பட்டபோது அந்தத் திட்டத்தை மறுத்த அமைச்சுக்களும் இருந்தன. இந்த நிலையிலேயே சுகாதரம் தொடர்பிலான பாராளுமன்ற மேற்பார்வை குழுவின் தலைவராக முன்னாள்  நாடாளுமன்ற உறுப்பினர் மயில்வாகனம் திலகராஜா செயற்பட்ட காலத்தில், திட்டத்துடன் தொடர்புடைய ஐந்து அமைச்சுக்களையும் இணைத்து பெறப்பட்ட உடன்பாட்டு அறிக்கை நாடாளுமன்றத்திற்கு சமர்ப்பிக்கப்பட்டது. இப்போது அது குறித்துப் பேசவோ கேள்வி எழுப்பவோ நாடாளுமன்றத்தில் அவர் இல்லை.

அதே நேரம் முதலாவது அமைச்சரவைப் பத்திரம் சமர்ப்பித்த காலத்தில் பிரதி சுகாதார அமைச்சராக இருந்த, தற்போதைய பதுளை மாவட்ட நாடாளுமன்ற  உறுப்பினர் வடிவேல் சுரேஷ் கேள்வி- பதில்  நேரத்தில் எழுப்பியுள்ளார்.

இதற்கு பதில் அளித்தசுகாதார அமைச்சர் பவித்ரா வன்னியாரச்சி தோட்ட சுகாதார முறைமை அரசாங்கத்தின் கீழ் கொண்டுவரப்படும்  என  சபையில் கூறியுள்ளார்.

அனைத்து தோட்ட வைத்தியசாலைகளையும் அமைச்சரவை பத்திரத்தினூடாக அரசாங்கத்தின் கீழ் கொண்டுவர நடவடிக்கை எடுக்கப்படும் என சுகாதார அமைச்சர் பாராளுமன்றத்தில் தெரிவித்துள்ள கருத்து வரவேற்கத்தக்கது. அதே நேரம் அமைச்சரவைப் பத்திரத்தினைத் தாண்டி தோட்ட சுகாதார முறைமையை தேசிய மயமாக்குவதற்கு பல பணிகள் முன்னெடுக்கப்படல் வேண்டும். அதற்கு சுகாதார மேற்பார்வைக் குழு அறிக்கையை கையில் எடுக்க  வேண்டும் என அந்த அறிக்கை தயாரிப்பிற்கு தலைமை வகித்த முன்னாள்  நாடாளுமன்ற உறுப்பினர் மயில்வாகனம் திலகராஜா  ஊடகங்களுக்கு அறிக்கை விடுத்துள்ளார்.

அவர் விடுத்திருக்கும் ஊடக அறிக்கையிலே, கடந்த கால அமைச்சரவைப் பத்திரங்களுக்கு  என்ன ஆனது என கேள்வி எழுப்பி உள்ளார். எனவே நாடாளுமன்றத்திற்கு சமர்ப்பிக்கப்பட்ட உத்தியோகபூர்வ அறிக்கையிலே உடன்பட்டவாறு அனைத்து அமைச்சுக்களையும் இணைத்து இந்த பிரச்சினைக்கு தீர்வு காண வேண்டும் என வலியுறுத்தி உள்ளார்.

இந்த அமைச்சுக்களை இணைத்து தயாரிக்கப்பட்ட ஆவணத்தின் அவசியத்தை  அமைச்சர் பவித்திரா வனலனியாரச்சியின் உரையில் அவதானிக்க முடிகிறது. நாடாளுமன்ற உறுப்பினர் வடிவேல் சுரேஷ் எழுப்பிய கேள்விகளுக்கு பதில் அளிக்கும் போது வைத்திய நிலையங்களை அபிவிருத்தி செய்ய காணிகளைப் பெற்றுக் கொள்வதில் உள்ள சிக்கல்களை அமைச்சர் விபரக்கிறார்.

தான் சுகாதார மேற்பார்வைக் குழுவாக செயற்பட்ட காலத்தில் 500 தோட்ட வைத்திய நிலையங்களையும்  அரசாங்கத்தின் கீழ் கொண்டுவர  நிர்வாக மட்டத்தில் ஏற்பாடுகள் சீர் செய்யப்பட்டுள்ளன என்றும் திட்டத்துடன் தொடர்புடைய சுகாதார அமைச்சு, பெருந்தோட்டத்துறை அமைச்சு, காணி அமைச்சு, தோட்ட உட்கட்டமைப்பு அமைச்சு, மாகாண சபைகள் உள்நாட்டு அலுவல்கள் அமைச்சு, நிதி அமைச்சு ஆகியவற்றின் ஒப்புதல் பெறப்பட்ட அறிக்கை நாடாளுமன்றத்துக்கு சமர்ப்பிக்கப்பட்டுள்ளது என்றும் அதன் பிரதிகள் சுகாதார அமைச்சின் 'தோட்ட நகர சுகாதார பிரிவு' பணிப்பாளரிடம் கையளிகலகப்பட்டுள்ளது என்றும் தெரிவிக்கிறார். சுகாதார அமைச்சின் அதிகாரிகள் அதனை அதனை நடைமுறைப்படுத்த தயாராக உள்ளதாகவும் அதற்கான அங்கீகாரத்தை புதிய அமைச்சரவைப் பத்திரம் வழங்கினாலே போதுமானது என்றும் தெரிவிக்கிறார்.

கட்சி, அரசியல் பேதங்களுக்கு அப்பால் தோட்ட சுகாதார முறைமையை தேசிய சுகாதார முறைமைக்குள்  கொண்டு வர அனைவரும் ஓரணியாக குரல் கொடுக்க முன்வர வேண்டும். எனவே சம்பளப்பிச்சினையில் மலையக அரசியல் தலைமகள் இழுபறி நிலையை அடைந்து படும் அவஸ்த்தையை உணர்ந்து, கொரொனா போன்ற கொடிய நோய்ப்பரவல் தீவிரமடைந்துவரும் நிலையில் பெருந்தோட்ட சுகாதார முறைமையை அரசாங்கத்தின் பொறுப்பின் கீழ் கொண்டுவர ஒரே கருத்து நிலைப்பாட்டில் நின்று செயற்படுவதே வெற்றியைத் தரும் .  

14/01/2021

 நடன ஆசிரியர் திவ்யா சுஜேன்

 2020 உலகளாவிய ரீதியில் பலர்க்கும் பலவிதமான மாற்றங்களை தந்த ஆண்டு. பொதுவாக மேடை கலைஞர்கள் ரசிகர்களின் கரவொலியை கண்கொண்டு பார்க்க முடியாமால் போன காலம். ஆனால், பொது முடக்க காலத்தில் தனது அதீத திறமையால் உலகளாவிய ரீதியில் பல செயற்திட்டங்களை முன்னெடுத்து இலங்கை கலை உலகத்திற்கு பெருமை சேர்த்துள்ளார் நம் நாட்டின் சிறந்த நடன கலைஞர் ,நடன ஆசிரியர் ' காலசூரி ' திவ்யா சுஜேன்.

இலங்கையின் பல இளங்கலைஞர்களின் உள்ளத்தினை கவர்ந்தவர், தற்போது உலகளாவிய ரீதியில் உள்ள மூத்த கலைஞர்களனின் அன்பினைத்  தன் தமிழாலும், பண்பாலும் பெற்றவர் திவ்யா சுஜேன். ஆம் , இவர் கையாண்ட புதிய வழி தான் இணையம் வாயிலாக கலைச் செயற்பாடுகள் வழங்கல். இவரது வெற்றியின் சூத்திரமாய் அமைந்த மெய்நிகர் செயல்பாடுகளை கையாண்ட அனுபவத்தினை பற்றி அவரிடமே கேட்டு அறிவோம்.

15 ஆவது ஆண்டில் பயணிக்கும் அபிநயக்ஷேத்ராவின் கற்பித்தல் பொது முடக்க காலத்தில்  திடீரென நிறுத்தப்ப பட்ட போது எவ்வகை மாற்றத்தை உணர்ந்தீர்கள்.?

அபிநயக்ஷேத்திராவினால் மார்ச் முதலாம் திகதி மிக முக்கியமான வரலாற்றுப் பதிவாக திருக்கேதீஸ்வர ஸ்தல புராண நாட்டிய நாடகத்தினை மேடையேற்றினோம்.  அந்த நிகழ்வில் இலங்கை , இந்திய கலைஞர்கள் பலரோடும் , அபிநயக்ஷேத்ரா குடும்பம் ஒன்று சேர்ந்து மிக்க ஆனந்தத்துடன் இருந்தோம். 

ஆனால், ஒரு வாரத்திற்குள் பொது முடக்கம் அறிவிக்கப்பட்டது. ஒரு சில மாதங்கள் உடலுக்கும் உள்ளத்திற்கும் நல்ல ஓய்வு தந்தோம். அதன் பிறகு இணைய வழி வகுப்புகளை ஆரம்பித்தோம். அதில் பெற்ற வருமானத்தை உலர் உணவு வழங்கும் திட்டத்திற்கு உபயோகித்தோம்.

இணையம், நாட்டியம் கற்பிக்க ஏதுவான சாதனமா ? எவ்வகையான சவால்களை எதிர் நோக்கினீர்கள் ?

அபிநயக்ஷேத்ராவின் மாணவிகள் பெரும்பாலும் என்னிடம் நேரடியாக வந்து கற்று மகிழவே விருப்பம் கொள்வர். இருப்பினும் புதிய மாற்றத்தை உணர்ந்தவர்களாக , இணையத்தில் கற்பிக்க இலகுவான முறையில் குழுக்களை பிரித்து ஆரம்பித்தோம்.

சவால் என்று கருதவில்லை ஆனால் சில சுவாரசியமான அனுபவங்கள் கிடைத்தது. கற்பித்தலில் நன்கு பரீட்சயமான ஒருவரால் தான் இணையத்தில் நாட்டியம் சொல்லி கொடுக்கலாம் என்பது புரிந்தது.

நமது நாட்டில் உள்ள நடனப் பரீட்சைகளுக்கு தயாராகும் மாணவர்களை கருத்தில் கொண்டு நாட்டியத்தின் முக்கிய கூறுகளான அபிநயம், தாளம் இரண்டிற்கும்  இணைய வழி பயிற்சிப் பட்டறைகளை வழங்கினோம்

இந்த அனுபவமே தற்போழுது , நட்டுவாங்க சான்றிதழ் கற்கை நெறியை உலகளாவிய ரீதியில் உள்ள மாணவர்கள், கலைஞர்களுக்கு இணைய வழியினூடாக வழங்க வேண்டும் என்ற எண்ணம் உருவாகக் காரணமானது. நட்டுவாங்க கற்கை நெறியை ,இந்தியா, லண்டன், நோர்வே, சிங்கப்பூர், இலங்கை நடன கலைஞர்கள் மேற்கொள்கின்றனர். நம் நாட்டின் கலை கல்வி மீது எப்போதுமே கருத்தகா இருப்போம். இந்த கற்கை நெறிக்கும் பொருளாதார வசதி குறைந்த 14 மாணவர்களுக்கு புலமை பரிசு வழங்கினோம். குறிப்பாக  யாழ்ப்பாணம், கிளிநொச்சி, மன்னார், திருகோணமலை, மட்டக்களப்பு, நுவரெலியா, பஸ்ஸர, பொகவந்தலாவ, பதுள்ள, ஹட்டன் இடங்களில் இருந்து பல்கலைக்கழகம் சென்று நடனத்தை பிரதான பாடமாக கற்கும்  மாணவர்களுக்கு புலமைப் பரிசில்களை வழங்கினோம்.

எப்போதுமே புதிய முயற்சிகளுக்கு முன்னோடியாக இருக்கும் நீங்கள் , பொது முடக்க காலத்தில் எவ்வகையான முயற்சியை மேற்கொண்டீர்கள் ?

சிறு வயதில் இருந்தே கலைஞர்கள் ஒற்றுமையாக செயற்பட வேண்டும். கலைகளின் மூலம் அன்பினை பரப்பிட வேண்டும் என்பதில் ஆசை அதிகம். நம்பிக்கை என்றும் சொல்லலாம். இந்த எண்ணம் பொது முடக்க காலத்தில் மிக தீவிரமாக இருந்தது. அதுவே உலக இலங்கை பரதநாட்டிய கலைஞர்கள் சங்கம் உருப்பெற காரணமானது.

உலகளாவிய ரீதியிலான இச்சங்கம் எப்போது ஆரம்பிக்கப்பட்டது ?

எனது குருநாதர் பத்ம பூஷண் பேராசிரியர் C.V.  சந்திரசேகர் ஐயாவின் 85 ஆவது பிறந்த நாள் அன்று ஆரம்பித்தோம். இச்சங்கத்தின் மூல நோக்கமும் நமது குரு பரம்பரை தொடர வேண்டும் என்பதே. இணைய வழியினூடான தொடர்பாடலுக்கு யாவரும் தயாராகி இருந்ததாலும், இக்கால கட்டத்தில் கலைஞர்கள் இன்னொரு பரிமாணத்தில் கலைக்குரிய செயற்பாடுகளை முன்னெடுக்க வேண்டும் என்கிற மன நிலையில் இருந்ததாலும் குறுகிய காலத்திற்குள் இச்சங்கத்தின் செயற்பாடுகள் வெற்றி கண்டன.

கடந்த 6 மாத காலத்திற்குள் பல இணைய வழி நிகழ்வுகளை நடாத்தி இருக்கிறீர்கள். இதில் முக்கியமானவற்றை பகிர்ந்துகொள்ள முடியுமா?

அபிநயக்ஷேத்ரா நடனப்பள்ளியினூடாகவும், உலக இலங்கை பரதநாட்டிய கலைஞர்கள் சங்கத்தின் ஊடாகவும் இணைய வழி நிகழ்வுகளை நடாத்துவதற்கு , சங்கத்தின் செயலாளர் லண்டன் நிறைஞ்சனா சுரேஷ் அவர்கள் ஒருங்கிணைத்து வழங்குவார். முக்கியமாக 'ஞானச்சிற்பி' நிகழ்வு  பிரதி வியாழன் தோறும் வெளிவருகிறது.  இதன் மூலமாக உலகளாவிய ரீதியில் உள்ள புலம் பெயர்ந்த மூத்த இலங்கை நடன ஆசிரியர்கள் பலரும் ஆற்றிய நடனப்பணிகளை உலகறிய செய்ய முடிகிறது. நவராத்ரி 9 நாட்களும் 9 நாடுகளில் உள்ள கலைஞர்கள் இணைந்து  ' வையமெல்லாம் நீ நிறைந்தாய் ' ஆற்றுகை நிகழ்வினை நடத்தினோம். இலங்கையின் ஆற்றுகை கலைஞர்களின் திறம் மேலும் ஓங்கிட வேண்டும் என்று ' நாட்டியத்தின் உயிரூட்டி ' என்ற கருப்பொருளில் மாதம் தோறும் கலைத்துறையில் ஆழ்ந்த அனுபவமுள்ள இலங்கை இந்திய கலைஞர்களின் விரிவுரைகளை அமைத்து வருகிறோம்.

இலங்கையில் இருந்து வழங்கும் சர்வதேச மார்கழி உட்சவமாக ' ஆடல் மார்கழி ' நிகழ்வினை 10 நாட்களுக்கு வழங்கவுள்ளோம். அண்மையில் மகாகவி சுப்ரமணிய பாரதியாரின் பிறந்த நாள் கொண்டாட்டமாக உலக பாரதி விழாவினை வழங்கி நம் நாட்டுக்கு பெருமை தரவல்ல நிகழ்வாக  சிறப்பித்தோம்.

இவற்றை விட சமூக வலை தளங்களிலும் , அபிநயக்ஷேத்ரா மாணவிகளின் ஆற்றுகைகள் வெளிவருகின்றன. குறிப்பாக உலக தமிழ் எழுத்தாளர் சங்கத்தின் தொடக்க விழா ஆற்றுகை, திகட சக்கர குழுவின் பிரதி வெள்ளி தோறும் நடைபெறும் 'திருவடிக்கீழ் சொல்லிய பாட்டு ' நிகழ்வில் பக்தி இலக்கியங்களை முன்வைத்து 30 பாகங்கள் இதுவரை செய்துள்ளோம். ' பாரதமும் பாரதியும்' என்று அபிநயக்ஷேத்ராவின் தொடர் ஆக்கங்கள் என நேரடி வகுப்புகளை வைக்க முடியாத காலத்தில் மாணவர்களை ஊக்குவிக்க  தொடர்ந்து செயல்படுகிறோம்.  கலைகள் நம் நாட்டின் அடையாளங்கள் , இதன் மூலம் நல்லதொரு சமுதாயத்தை உருவாக்க முடியும் என்பதே நம்பிக்கை.

இணைய வழியினூடாக நடந்த ஒரு நிகழ்வு பலரது கவனத்தையும்   ஈர்த்தது என்றால் உலக பாரதி விழா. இது எவ்வாறு சாத்தியமானது.?

ஆமாம். ஐயனின் அருள். அன்று பார்வையாளர்கள் பலரையும் இணைத்துக்கொள்ள முடியாத அளவு பாரதி விரும்பிகளின் எண்ணிக்கை அமைந்துவிட்டது. நிகழ்ச்சி ஆரம்பிக்கும் போதே நூற்றிற்கு மேற்பட்ட பன்னாட்டு அன்பர்கள் இணைந்திருந்தார்கள்.

இந்நிகழ்வு சிறப்புற அமைய மூல காரணம் பாரதி வம்சத்தினர் தான். பாரதியின் முத்தமிழை முன்னிறுத்தி ' நின்பால் அத் தமிழ் கொணர்ந்தேன் ' என்னும் நிகழ்வில் இயற்றமிழை பாரதியாரின் எள்ளு பெயரன் 'பசுமைக் கவிஞன் ' திரு நிரஞ்சன் பாரதி அவர்களும், இசைத்தமிழை பாரதியாரின் கொள்ளுப் பெயரன் இசைச்சக்கரவர்த்தி டாக்டர் ராஜ்குமார் பாரதி ஐயாவும் வழங்கி சிறப்பித்தனர். இத்தலைப்பில் உரையாடுவதற்கு சாலப் பொருத்தமானவர்கள் அவர்களே. நாடகத்தமிழ் பற்றிய உரையை நான் வழங்கி இருந்தேன். 

முத்தமிழ் விருந்தாக அமைந்த இந்த நிகழ்விற்கு முதன்மை விருந்தினராக இந்து சமய கலாச்சார அலுவல்கள் திணைக்கள பணிப்பாளர் திரு அருளானந்தம் உமாமகேஸ்வரன் ஐயா அவர்கள் கலந்து சிறப்பித்தார்.

இணைய வழி குறித்தான உங்கள் வருங்கால திட்டங்கள் பற்றி குறிப்பிடுங்கள் ?

 இலங்கையின் கலை வளர்ச்சிக்கும், நாட்டியத்தில் பற்றுகொண்டோர்க்கு கலைக் கல்வி வழங்குவதிலும் பாரிய பங்களிப்பினை அபிநயக்ஷேத்ரா முன்னெடுத்து நடத்துகிறது. தற்போழுது உலக இலங்கை பரதநாட்டிய கலைஞர்கள் சங்கத்தினூடாகவும் புலம் பெயர்ந்த நாடுகளில் உள்ள உயர் எண்ணம் கொண்ட சிறந்த நடன ஆசிரியர்கள் நம் நாட்டின் கலை வளர்ச்சிக்கு உதவிட முன் வந்துள்ளனர். யாவரதும் துணையோடு ஒன்று பட்டு கலைஞானத்தை வளர்த்திட, பகிர்ந்திட பல முயற்சிகளை எடுப்போம். உள்ளத்தில் உண்மை ஒளியோடு தெளிந்து செய்யும் காரியம் அனைத்திற்கும் இறை அருளும், குரு அருளும் துணை இருக்கும் என்று நம்புகிறோம்.