கடந்த இரண்டாண்டு காலமாக வீரகேசரி நாளிதழில் பிரதி வியாழன் தோறும் வெளிவந்த அரசியல் ஊடகவியலாளர் ஜீவா சதாசிவம் எழுதிய அரசியல் பத்திகளின் தொகுப்பு ‘அலசல்’ (சமகால அரசியல் நிலைவரங்கள்  2017/2018) எனும் தலைப்பிலேயே நூலாக வெளியிடப்பட்டுள்ளது. 

குமரன் பதிப்பகத்தின் வெளியீடாக 309 பக்கங்களில் வெளியாகியிருக்கும் இந்த நூல் 64 அரசியல் கட்டுரைகளைக் கொண்டது. வெளியீட்டு விழா 22- –11–2018 வியாழன் அன்று சாகித்ய ரத்னா தெளிவத்தை ஜோசப் தலைமையில் கொழும்புத் தமிழ்ச்சங்க சங்கரப்பிள்ளை மண்டபத்தில் நடைபெற்றது. 

நிகழ்வு மங்கள விளக்கேற்றல், ஆசிரியை திருமதி சுபாஷினி பிரணவனின் மாணவிகளின் தமிழ்த்தாய் வாழ்த்து என்பவற்றோடு ஆரம்பமானது. ஊடகவியலாளர் எம்.ராம் வரவேற்புரை வழங்க சாகித்ய ரத்னா தெளிவத்தை ஜோசப் தலைமையுரை ஆற்றினார். மலையகத்தின் கொட்டகலை பகுதியில் இருந்து வந்து வீரகேசரியின் ஆசிரியர்பீடம் வரை உயர்ந்தவர் காலம் சென்ற எஸ்.எம்.கார்மேகம். 

வீரகேசரியின்  குறிஞ்சிப்பரல்களை உருவாக்கி மலையக எழுத்துக்களுக்கும் செய்திகளுக்கும் களம் அமைத்தவர் கார்மேகம். பின்னாளில் தமிழகம் சென்று இந்திய பத்திரிகைகளிலும் ஆசிரிய பீடத்தில் பணியாற்றியவர். ஜீவா சதாவசிவத்தின் வீரகேசரி பத்திரிகை பணி பற்றி பேசும்போது எனக்கு வீரகேசரி கார்மேகத்தின் நினைவு வருவது தவிர்க்க முடியாதது. 

இதுபோன்ற பத்திரிகையில் இவ்வாறு மேல் எழுந்து தொடர் கட்டுரை எழுதி அதனை நூலாக வெளிக்கொணர்வது இலகுவான காரியமல்ல.அரசியல் கட்டுரைகளை எழுதுபவர்கள் புனைபெயரில் புகுந்து கொண்டு எழுதுவது வழக்கம். ஆனால் நான்தான் ஜீவா சதாசிவம எழுதுகிறேன் என தன்னை வெளிக்காட்டி ஒரு அரசியல் தொடரை எழுதி பெண்ணாக சாதனைச் செய்திருக்கிறார் ஜீவா சதாசிவம். 

அவர் பணியாற்றும் நிறுவனம் மீது அவர் கொண்டிருக்கும் பற்றும் தன்னை வளர்த்துவிட்டவர்களை கனம் பண்ணும் பழக்கமும் அவரை இந்த அளவுக்கு உயர்த்தி விட்டிருக்கிறது எனலாம்.சங்கமம் எனும் இலக்கிய பகுதியின் பொறுப்பாசிரியராக இருந்து பல நூறு ஆசிரியர்களின் முதல் நூல் வெளியீட்டினை முதல் பிரசவம் என பதிவு செய்துள்ள ஜீவா சதாசிவம் தனது கட்டுரைகளை தொகுப்பு நூலாகக் கொண்டுவந்ததன் மூலம் அந்த வேதனையையும் பூரிப்பையும் கூட அனுபவித்திருப்பார். இந்த கட்டுரைகளுக்காக அவர் இலங்கை பத்திரிகை தாபனத்தின் சிறந்த பத்தி எழுத்துக்கான விருதையும் வென்றிருக்கிறார் என்பது சிறப்பு என்றும் தெளிவத்தை ஜோசப் தனது தலைமையுரையிலே குறிப்பிட்டார்.

எக்ஸ்பிரஸ் நியூஸ் பேப்பர்ஸ் நிறுவனத்தின் முகாமைத்துவ பணிப்பாளர் குமார் நடேசன் நூல் வெளியீட்டினை செய்துவைக்க முதல் பிரதியை இலக்கிய புரவலர் ஹாசிம் உமர் பெற்றுக்கொண்டார். தொடர்ந்து  சிறப்பு பிரதிகள் வழங்கிவைக்கப்பட்டன. 

நூலின் ஆய்வுரையை சாகித்ய ரத்னா பேராசிரியர் சபா ஜெயராசா வழங்கினார். ஊடகத்துறையில் பெண்களை ஊக்குவித்த பெரு மரபு வீரகேசரிக்கு உண்டு.முதுபெரும் எழுத்தாளர்களாகிய யோகா பாலச்சந்திரன்,அன்னலட்சுமி இராஜதுரை மரபின் தொடர்ச்சியாக வந்திருப்பவர் ஜீவா. 

கனதியும் வாசிப்புத் தூண்டலும் கொண்ட பத்தி எழுத்து மரபுடன் வருவது வீரகேசரி. செய்தியும் செய்தி உசாவலும் கொண்ட பத்தி எழுத்துக்களை கே.வி.எஸ்.வாஸ், கே.பி.ஹரன் முதலானர்வர்கள் வல்லவர்கள். ‘ஊர்க்குருவி’ எனும் பெயரில் இவர்கள் எழுதிய பத்தியை வாசிப்பதற்கு என்றே வீரகேசரி விற்பனையான காலம் ஒன்று இருந்தது. பல்கலைக்கழகங்கள்,கல்வியியல் கல்லூரிகள்,ஆசிரிய கலாசாலைகள்,ஊடக நிறுவனங்கள் மற்றும் தொழில் நிறுவனங்களிலே பணிபுரியும் மலையகத்து இளம் தலைமுறையினரின் சமூகப் புலக்காட்சிக்கு பெண்களின் வகிபாகம் பற்றிய நிறுவலுடன் அலசலின் நுழைவாயில் அகலத் திறக்கிறது. 

அலசல் எழுத்துக்கள் சுவையேற்றம் பெறுவதற்கு காரணம் புலனாய்வு செய்திகளுடன் தொடரப்பட்டிருத்தலாகும்.செய்திகளோடு உறவாடும் செய்தியாளராக ஜீவா இருப்பதனால் அலசல் சமகால பிரச்சினைகளை சமூக  மேம்பாட்டுக்கு இட்டுச்செல்ல வேண்டும் என்ற முன்மொழிவுடன் அலசல் எழுத்துக்கள் இணங்கிச் செல்கின்றது. பேராசிரியர் ஏ.ஜே.கனகரட்ணா சொல்வதுபோல பத்தி எழுத்துக்கள் தொடர்ச்சியான வாசிப்பின் ஊடே வளம் பெறுவது என்கின்றதன் அடிப்படையில் ஜீவாவின் தளரா எழுத்து முயற்சி மேல் எழுச்சி கொள்ள வாழ்த்துகிறேன் என தெரிவித்தார். 

நூலின் கருத்துரையை வழங்கிய நல்லாட்சிக்கான தேசிய முன்னணியின் தவிசாளரும் அக்கறைப்பற்று மாநகர சபை உறுப்பினருமான எழுத்தாளர், ஆய்வாளர் சிராஜ் மஷ்ஷூர் தனது கருத்துரையில், பெண்ணாக அரசியல் பத்தி எழுத்துக்களில் ஆர்வம் காட்டிவருவதோடு மட்டுமல்லாமல் அதனை நூலாக்கி வெளியிடுவதிலும் அக்கறை காட்டியுள்ள சகோதரி ஜீவா பாராட்டுக்குரியவர். அரசியலில் பெண் நிலைப்பட்ட விடயங்களை, ஆண்கள் எழுத மறக்கின்ற விடயங்களை எல்லாம் இவரால் தொட்டுச் செல்ல முடிந்ந்திருக்கிறது. குறிப்பாக பெண்கள் அரசியலில் ஈடுபடுகின்ற போது எதிர்நோக்கும் வன்முறைகள் அதனை அவர்கள் எதிர்கொள்ளுதல் தொடர்பானது. 

ஒரு மலையகத்தவராகவும், ஒரு பெண்ணாகவும், ஒரு சிறுபான்மை சமூகத்தின் பிரதிநிதியாகவும் தனது எழுத்துக்களின் ஊடே ஜீவா தன்னை பிரகடனப்படுத்தியுள்ளார்.அவரது நிலையில் அவருக்கு வழங்கப்பட்ட அந்த பத்திரிகை பக்கத்துக்கு ஏற்ப பலதரப்பட்ட அரசியல் விடயங்களை அவர் தருவதற்கு முயற்சித்துள்ளார் என்பது தெரிகிறது. ஆனால் சில கட்டுரைகள் இன்னும் ஆழமாக பார்க்கப்பட்டிருக்கலாம்.

தேயிலையின் 150 ஆண்டு கால வரலாற்றைப் பேசவந்த கட்டுரை அந்த சூழலில் இருந்து வந்திருக்கக்கூடிய கட்டுரையாளரிடம் இருந்து இன்னும் அதிகமாக வெளிப்பட்டிருக்க வேண்டும். நாங்கள் நல்லாட்சி உருவாக்கத்திலே பங்கேற்றவர்கள் என்கின்றதன் அடிப்படையில் அந்த நல்லாட்சியை சிதைவுறச் செய்யும் கைங்கரியங்கள் அதில் பிரதான பாத்திரம் வகிப்போராலேயே முன்னெடுக்கப்படுகின்ற இந்த காலகட்டத்தில் அந்த நல்லாட்சி காலத்தில் இடம்பெற்ற பல்வேறு விடயங்களை பதிவு செய்கின்றதன் அடிப்படையில் ஜீவா தான் வாழ்ந்த அந்த நாட்களை எவ்வாறு அவதானித்தார் என்பதை இந்த நூல் பதிவு செய்துள்ளது என குறிப்பிட்டார். 

இன்னுமொரு கருத்துரையை வழங்கிய எழுத்தாளரும் ஆய்வாளரும் பாராளுமன்ற உறுப்பினருமான மல்லியப்புசந்தி திலகர் அலசல் நூலின் உள்ளடங்கியுள்ள தலைப்புக்களை வகைப்படுத்தி அதன் சாரத்தை பதிவு செய்தார். ஜீவா மலையகத்தை பிறப்பிடமாகக் கொண்டவர் என்ற வகையில் மலையகம் தொடர்பில் ஐந்தில் ஒரு பங்கு கட்டுரை எழுதப்பட்டிருக்கின்ற அதேநேரம் வட கிழக்கு தமிழ், சிங்கள சமூக அரசியல் விடயங்களையும் தேசிய அரசியல் நிலைவரங்களையும் ஆராய்ந்துள்ள  கட்டுரைகள் முஸ்லிம் அரசியல் சூழல் பற்றிய அவதானிப்புகளை தவறவிட்டுள்ளதாக தெரிவித்தார்.

 அதேநேரம் தப்பித்த தேயிலை எனும் கட்டுரை முழுமைபெற்றதாக தெரியவில்லை என்றும் சுட்டிக்காட்டினார். 2017/2018 ஆண்டு காலத்தில் நாட்டில் நிலவியது நல்லாட்சி சூழல் என்பதை பதிவு செய்யும் பல கட்டுரைகளை தேசியம், மலையகம், பெண்ணிலை, ஊடகம், பாராளுமன்றம் என பல கோணங்களில் இருந்தும் அலசப்பட்டுள்ளது. சங்கமம் எனும் இலக்கிய பகுதிக்கு  பொறுப்பாசிரியர் என்பதாலோ என்னவோ தனது அரசியல் கட்டுரைகளுக்கு தலைப்பிடும்போது ஓர் இலக்கிய ரசனையோடு தலைப்பிட்டுள்ளார். 

அத்துடன் அவ்வப்போதைய நிகழ்வுகளின் அடிப்படையில் பத்தி கட்டமைக்கப்படும்போது ஒரு திரைக்கதைப் பாணியும் தெரிகிறது. செய்தியோடு உறவாடி செய்தியாளராக புலனாய்வு கலந்து தந்திருப்பதானது அன்று சொன்னவைகளுக்கு இன்று என்ன நடந்திருக்கிறது என்பதை ஊகிக்கக் கூடியதாக இருக்கின்றது. அந்த வகையில் நல்லாட்சி : அன்று ஒன்று, இன்று இரண்டு. நாளை எனும் கேள்விக்குறியுடன் அமைந்த கட்டுரை காத்திரமானது. அதேபோல தகவல் உரிமைச்சட்டம் யாருக்காக, காணாமல் ஆக்கப்பட்டோருக்கான அலுவலகம், வெறுப்புமிழும் உரை போன்றன பற்றிய பதிவுகள் முக்கியத்துவம் உடையன. 

அதேபோல மிகச்சுருக்கமான தலைப்புகளில் எழுதப்பட்டிருக்கும் பெற்றோலும் அரசியலும், வாரிசு அரசியல், அரசியலும் வியாபாரமும், குழுக்களின் அரசியல், விலங்குகளின் அரசியல் எனும் அரசியலின் வகைப்படுத்தல்கள் சுவாரஸ்யமிக்கவை. இந்த தலைப்புகளை வாசிக்கும் போது நமக்குள் ஒரு சிரிப்பலை எழுமானால் அது நம்மை நாமே பார்த்து சிரித்துக்கொள்வதாக அமையும்.  

நாமே இந்த மாற்றத்துக்கு வாக்களித்துள்ளோம். இலங்கை அரசியல் வரலாற்றில் எப்போதும் இல்லாத அளவுக்கு ஏற்படுத்தப்பட்டிருக்கும் இந்த மாற்றத்தினை மாற்றியமைக் கவேண்டிய பொறுப்பும் இந்த சமூக த்துக்கே உரியது.  கடந்த மூன்றாண்டு காலமாக நாட்டில் இடம்பெற்றது நல்லாட்சிதான் என்பதை அது முடிவு றுத்தப்பட்ட அடுத்த மூன்று நாட்க ளில் தெரியக்கூடியதாக இருந்தது. அத்தகைய ஒரு நல்லாட்சி இடம் பெற்ற கடந்த மூன்றாண்டுகளில் பெரும்பகுதி அரசியல் நிகழ்வுகள் வாராந்தம் அலசி இருக்கும் இந்த அலசல் எனும் நூல் நல்லாட்சி காலத்தின் நாட்குறிப்பு என்று கொள்ளலாம் என்றும் மல்லியப்புசந்தி திலகர் தெரிவித்தார். 

நூலாசிரியர் ஜீவா சதாசிவம் தன்னுடைய ஏற்புரையை நன்றியுரையாக மாத்திரம் சுருக்கிக்கொண்டார். தனது எழுத்துக்கும் முயற்சிக்கும் பங்களிப்பு செய்த அனைவருக்குமான நன்றி கூறலாகவே அது அமைந்தது. 

ஊடகவியலாளர் நிர்ஷன் ராமானுஜம் சிறப்பாக நிகழ்ச்சிகளை தொகுத்தளித்திருந்ததுடன் ஊடகத்துறை, இலக்கியத்துறை, கலைத்துறை, அரசியல்துறை என அனைவரதும் பங்களிப்புடன் அரங்கம் நிறைந்த நிகழ்வாக அமைந்தது அலசல் வெளியீடு.

ஏ.எஸ்.எம்.நவாஸ்

சிரேஷ்ட ஊட­க­வி­ய­லா­ளரும் அர­சாங்க தகவல் திணைக்­க­ளத்தின் ஓய்­வு­நிலை தகவல் அதி­கா­ரியும் படைப்­பி­லக்­கி­ய­வா­தியும் அரச அங்­கீ­கா­ரம்­ பெற்ற சிங்­க­ள -­– தமிழ் மொழி­பெ­யர்ப்­பா­ள­ரு­மான கலா­பூஷணம் நூருல் அயின் நஜ்முல் ஹுசைனின் இலங்கை முஸ்லிம் பெண் எழுத்­தா­ளர்கள் பற்­றிய ஆய்வு திரட்டான "மின்னும் தார­கைகள்"   எனும் நூல்  எதிர்­வரும் 11ஆம் திகதி வெளி­யிடப்படவுள்ளது. இந்நிலையில், இந் நூலாக்க முயற்சி அவரது இலக்கியப்பயணம் பற்றியதான விடயங்கள் தொடர்பில் கலந் துரையாடக்கிடைத்தது. இதன்போது அவர் எம்முடன் பகிர்ந்துக்கொண்ட விடயங்கள் வாசகர்களுக்காக...

உங்­க­ளது  எழுத்­து­லகப்  பிர­வேசம்பற்றி எம்முடன் பகிர்ந்துகொள்ள முடியுமா?

எனது எழுத்­து­லகப் பிர­வேசம் 1975ஆம் ஆண்­டி­லி­ருந்தே ஆரம்­ப­மா­னது. பாட­சா­லையில் உயர் வகுப்பு படிக்கும் போதே வானொ­லிக்கும் பத்­தி­ரி­கை­க­ளுக்கும் ஆக்­கங்கள் எழு­து­வதை எனது முக்­கிய பொழு­து­போக்­காகக் கொண்­டி­ருந்தேன். அன்று ஏற்­பட்ட அந்த எழுத்­து­லக மோகம் என்னை  அன்­றைய ஜன­ரஞ்­சக பத்­தி­ரி­கை­க­ளான "தின­பதி – சிந்­தா­மணி" அலு­வ­ல­கத்­துக்கு கொண்டு போய் சேர்த்­தது. 

1980ஆம் ஆண்டு மே மாதம் 5ஆம் திகதி ஒரு பயிற்­சிப் ­பத்­தி­ரி­ கை­யா­ள­ராக "தின­பதி- – சிந்­தா­மணி" அலு­வ­ல­கத்­துக்கு சென்ற நான் அந்த அலு­வ­லகம் 1990ஆம் ஆண்டு மூடப்­படும் வரை அங்­கேயே கட­மை­யாற்­றினேன். பத்­தி­ரிகை உலக ஜாம்­பவான் என்று போற்­றப்­படும் எனது பத்­தி ­ரிகை உலக தந்­தை­யான எஸ்.டி.சிவ­நா­யகத்தின் ஒரு மாண­வி­யாக மட்­டு­மல்ல, மக­ளாக நான் பெற்ற பயிற்­சி­கள்தான் இன்று வரை இத்­து­றை­யி­லேயே என்னை நிலை­நி­றுத்­தி­ன எனலாம். அந்தப்  பத்­தி­ரிகை அலு­வ­லகம் மூடப்­பட்­டதும் எனது துறைக்கு நான் முற்­றுப்­புள்ளி வைக்­க­வில்லை. இன்றும் எனது எழுத்­து­லகப் பயணம் தொடர்ந்து செல்­கின்­றது. 

இலங்கை முஸ்லிம் பெண் எழுத் தாளர்கள் பற்றிய தொகுப்பை வெளி­யிட உங்­க­ளுக்கு ஏற்­பட்ட ஆர்வம் குறித்து எம்­முடன் பகிர்ந்துகொள்ள முடி­யுமா? 

சுமார் 11 வரு­டங்­க­ளுக்கு முன்னர் என் மனதில் தோன்­றிய ஆசைதான் இது. 2007ஆம் ஆண்டு இலங்­கையில் நடை­பெற்ற உலக இஸ்­லா­மிய தமிழ் இலக்­கிய மாநாட்டில் மகளிர் அரங்கில்  சமர்ப்­பிப்­ப­தற்­காக "இலங்கை முஸ்லிம் பெண்­களின் ஊட­கப்­பங்­க­ளிப்பு” என்ற தலைப்பில் ஆய்­வுக்­கட்­டுரை ஒன்றை எழுதும் சந்­தர்ப்பம் எனக்குக் கிடைத்­தது. இந்த ஆய்­வுக்­காக தக­வல்­களை திரட்டும் போதுதான் இலங்கை முஸ்லிம் பெண் எழுத்­தா­ளர்கள் பற்­றிய ஆய்வு நூல் ஒன்றை எழுத வேண்டும் என்ற ஆசை என் உள்­ளத்தில் துளிர் விட்­டது. நீண்ட நாள் கன­வுதான் சுமார் 11 வரு­டங்­களின் பின்னர் இப்­போது  நன­வா­கி­யுள்­ளது.

இத் தொகுப்பில் இலங்­கையில் உள்ள அனைத்து முஸ்லிம் பெண் எழுத்­தா­ளர்­களும் உள்­ளடங்குகின்­றார்­களா? 

இலங்­கை யிலுள்ள அனைத்து முஸ்லிம் பெண் எழுத்­தா­ளர்­க­ளையும் உள்­ள­டக்­கி­யுள்ளேன் என்று எனக்கு உறு­தி­யாகக் கூறி­விட முடி­யாது. அவர்­களில் ஒரு சிலர் விடு­பட்­டி­ருக்­கலாம். இன்னும் சிலர் தமது தக­வல்­களைத் தரு­வதில் அச­மந்தப் போக்கைக் கடைப்­பி­டித்­தனர்.   சுமார் 140 முஸ்லிம் பெண் எழுத்­தா­ளர்­களை இனங்கண்­டுள்ளேன். 

இலங்­கை­யி­லி­ருந்து இடம்­பெ­யர்ந்து கடல் கடந்து வாழும் இலங்­கை­யைச்­சேர்ந்த ஒரு சில பெண் எழுத்­தா­ளர்­க­ளையும் இந் நூலில் உள்­வாங்­கி­யுள்ளேன். எந்த ஓர் ஊடக விளம்­ப­ர­மு­மின்றி மேற்­கொண்ட  என­து இந்த ஆய்வு நட­வ­டிக்கை இந்த­ளவு பெரு­வெற்­றியைத் தந்­தமை குறித்து மகிழ்ச்­சி­ய­டை­கிறேன். 

 இலங்கை முஸ்லிம் பெண் எழுத்­தா­ளர்­க­ளைப் ­பற்றி மட்­டுமே எழு­தப்­பட்ட நூற்­றுக்கும் மேற்­பட்ட பெண் எழுத்­தா­ளர்­களின் தக­வல்­க­ளுடன் வெளி­வரும் முத­லா­வது ஆய்வு நூலாக இது திகழ்­கி­றது. 

இந்த ஆய்வு நூலுக்­கான தக­வல்­க ளை எவ்­வாறு சேக­ரித்­தீர் கள்? எவ்­வ­ளவு காலம் சேக­ரித்­தீர்கள்?

நூலுக்­கான தக­வல்­களைப் பெறும் நட­வ­டிக்­கை­களை  2017 ஆம் ஆண்டு இறு­தியில் ஆரம்­பித்தேன். மார்ச் மாதம் 8ஆம் திகதி சர்­வ­தேச மகளிர் தினத்­தன்று இந்த நூலை வெளி­யிட்டால் மிகச்­சி­றப்­பா­கவும் பொருத்­த­மா­கவும் இருக்கும் என்று கரு­தியே இம்­மு­யற்­சியை ஆரம்­பித்தேன். ஆனால் தக­வல்­களை பெறு­வதில் ஏற்­பட்ட தாம­தத்­தால் தான் இந்த விழாவை நடத்த இவ்­வ­ளவு கால­மெ­டுத்­தது. 

இலங்­கையில் எந்­தெந்த பகு­தி­க­ளி­லெல்லாம் நூல்­களை வெளி­யிட்ட முஸ்லிம் பெண் எழுத்­தா­ளர்கள் இருக்­கி­றார்கள்? அவர்கள் வெளி­யிட்ட நூல்கள் எவை? நூல்­களை வெளி­யி­டா­விட்­டாலும் இலக்­கிய உல­குக்கு காத்­தி­ர­மான பங்­க­ளிப்புச் செய்து ஓயாது எழு­திக்­கொண்­டி­ருக்கும் முஸ்லிம் பெண் எழுத்­தா­ளர்கள் யார்?   

முதலில்  எனக்குத் தெரிந்த முஸ்லிம் பெண் எழுத்­தா­ளர்­க­ளுடன் தொடர்பு கொண்டு அவர்­க­ளது தக­வல்­களைப் பெற்­றுக்­கொண்டேன்.   "கல் மரத்தில் நார் உரிப்­பது" போல்தான் சிலரின் தக­வல்­களை சிர­மப்­பட்டே பெற்றேன். சுமார் ஒரு வருட கால எனது ஆய்வின் அறு­வ­டைதான் இந்த "மின்னும் தார­கைகள்".

இத் ­தொ­குப்­பு­களை செய்யும் போது உங்­க­ளுக்கு ஏற்­பட்ட அனு­ப­வங்­கள் பற்றி..?

 அனு­ப­வத்தில்  பாதியை மேலே கூறி­விட்டேன். இன்னும் சொல்­வ­தாக இருந்தால் முஸ்லிம் பெண் எழுத்­தா­ளர்­க­ளி­டையே இந் நூலில் உள்­வாங்­கப்­பட்­டுள்ள அனை­வ­ரி­டத்­திலும் ஒவ்­வொரு திறமை இருப்­பதைக் கண்டு நான் வியந்­து­போனேன்.  இத் தேடலின் போது நான் சந்­தித்த எமது ஒரு­சில பெண் இலக்­கிய ஆளு­மை­களைக் கண்டு உண்­மை­யி­லேயே நான் பிர­மித்­துப்­போனேன். இலை­ம­றை ­கா­யாக மட்­டு­மல்ல, இலக்­கியக் கனி­க­ளா­கவும் பலர் இருக்­கின்­றனர். மேகங்­களால் மறைக்­கப்­பட்ட தார­கை­க­ளா­கவும் இன்னும் சிலர்  இருக்­கின்­றனர். 

இலங்கை முஸ்லிம் பெண் எழுத்­தா­ளர்­க­ளி­டையே  நல்ல கவித்­து­வ­மிக்க பெண்கள், சிறு­கதை புனையும் பெண்கள்,  நாவல்­களை எழுதும் பெண்கள் என பல்­துறை ஆளு­மை­மிக்க பெண்கள் இருக்­கின்­றனர் என்­பதை நினைக்கும் போது இதயம் இனிக்­கி­றது. இவர்­க­ளி­டையே காணப்­படும் அபா­ரத்­தி­ற­மைகளும் ஆளு­மையும் உண்­மை­யி­லேயே என்னை மலைக்க வைத்­தன 

உங்­க­ளது தொகுப்பில் ஏன் முஸ்லிம் பெண் எழுத்­தா­ளர்­களை மாத்­திரம் தெரிவு செய்­துள்­ளீர்கள்?

முஸ்லிம் அல்­லாத  தமிழ்ப் பெண் எழுத்­தா­ளர்­களைப் பொறுத்­த­வரை அவர்கள் பற்­றிய பல்­வேறு ஆய்வு நூல்கள் வெளி­வந்­துள்­ளன. எனினும் தமிழ்ப் பெண் எழுத்­தா­ளர்­களைப் பற்­றியும் எழு­து­வ­தற்கு ஆசைதான். வளங்கள் வேண்­டுமே... அது மட்­டு­மல்ல, இலங்கை முஸ்லிம் பெண் எழுத்­தா­ளர்கள் நதி என்றால் இலங்கைத் தமிழ்ப் பெண் எழுத்­தா­ளர்கள் சமுத்­திரம் என்பேன். எனவே இந்த சமுத்­தி­ரங்­க­ளைப்­பற்றி எழு­து­வ­தற்கு  எனக்கு வளங்­களும் போதாது. வயதும் போதா­தென்று நினைக்­கிறேன். 

ஆனால், இலங்கை முஸ்லிம் பெண் எழுத்­தா­ளர்கள் பற்­றிய பரந்த அள­வி­லான ஆய்வு நூல் ஒன்று இது­வரை காலமும் வெளி­வ­ர­வில்லை என்­பதும் இவர்கள் பற்­றிய எந்த ஒரு பதிவும் இல்லை என்­பதும் சான்­றோர்கள் பலரின் குற்­றச்­சாட்டு மட்­டு­மல்ல, ஆதங்­க­மும்தான். அத்து­டன் ஒவ்­வொரு முறையும் உலக இஸ்­லா­மிய தமிழ் இலக்­கிய மாநா­டுகள் நடை­பெறும் காலங்­களில் இது­பற்றி அனை­வரும் பிரஸ்­தா­பிப்­ப­துண்டு. ஆனால் இந்த பணி­யைச்­செய்ய எவரும் துணிந்து முன்­வ­ர­வில்லை.

ஒரு முஸ்லிம் பெண்­ணாக இருக்கும் நீங்கள் உங்­களை எப்­படி  எழுத்­து­லகில் தக்க வைத்துக் கொள்­கின்­றீர்கள்?

எல்­லா­வற்­றுக்கும் அதிர்ஷ்­டமும் வேண்டும். துறைசார் துணைவர் ஒருவர் எனக்கு கண­வ­ராக அமை­யப்­பெற்­ற­மைதான் அந்த அதிர்ஷ்டம் என்பேன். திரு­மணம் பல பெண் எழுத்­தா­ளர்­களின் எழுத்­து­க­ளுக்கு கை விலங்கு போட்­டது என்­கி­றார்கள். ஒரு சில பெண் எழுத்­தா­ளர்­களைப் பொறுத்தவரை அது நிதர்­ச­ன­மான உண்மை தான்.  ஆனால் என்னைப் பொறுத்­த­வரை திரு­மணம் எனக்கு பூவி­லங்கு போட்­டது என்பேன். எனது எழுத்­து­க்க­ளுக்கு மட்­டு­மல்ல, எனது திற­மை­க­ளுக்கும்  நீர் வார்த்து உர­மு­மிட்­டது திரு­ம­ணம்தான்.  

இந்த வெற்­றியின் பெருமை முதலில் எனது பத்­தி­ரி­கை­யு­லகத் தந்தை எஸ்.டி.சிவ­நா­யகத்தைச் சாரும்.   இல்­ல­றத்தில் நுழைந்த பின்னர்  எனது கண­வரை அலு­வ­ல­கத்­துக்கு அழைத்த எஸ்.டி.எஸ். ஐயா அவர்­கள்,- “­நண்­பரே... உங்கள் மனைவி ஊடகத்துறை­யி­லும்-­ எ­ழுத்­துத்­து­றை­யிலும் நன்கு ஜொலிப்­பவர். இத்­து­றையில் அவ­ருக்கு சிறந்­ததோர் எதிர்­கா­ல­முண்டு. எனவே அவரை தொடர்ந்தும் அலு­வ­லகம் அனுப்பி வையுங்கள்” என்று கூறி ஆசி­யுரை பகர்ந்தார். பத்­தி­ரிகை உலக ஜாம்­பவான் சிவ­நா­யகத்தின்  எதிர்வு கூறலை இன்றும் நான் நன்­றி­யுடன் நினைவு கூர்­கிறேன். அவ்­வாறே எனது இல்­ல­றத்தில் மட்­டு­மல்ல, இலக்­கி­யத்­திலும் எனக்கு பக்­க­ப­ல­மாக இருக்கும் எனது வாழ்க்கை துணை­வரின் துணையை  எண்ணி மகிழ்­கிறேன்.  

உங்­க­ளது ஏனைய இலக்­கிய படைப்­புக்கள் பற்றி? 

எனது முத­லா­வது நூல் "தின­பதி – சிந்­தா­மணி" பத்­தி­ரி­கை­களில் நான் எழு­திய கட்­டு­ரை­களின் தொகுப்பாக 1997ஆம் ஆண்டு மார்ச் 16ஆம் திகதி "பண் பாடும் பெண்" என்னும் பெயரில் வெளி­வந்­தது.  அண்­மையில் நான் எனது அரச சேவை­யி­லி­ருந்து ஓய்வு பெற்­ற­தை­ய­டுத்தே தேங்கிக் கிடந்த எனது இலக்­கிய முயற்­சி­களை முன்­னெ­டுக்கும் சந்­தர்ப்பம் எனக்கு கிடைத்­தது. 

இதனால் தான் வீடு முழு­வ­திலும் நிரம்­பிக்­கி­டந்த எனது கணவர் நஜ்முல் ஹுசைனின் கவி­தை­க­ளை­யெல்லாம் திரட்டி "நஜ்முல் ஹுசைனின் நட்­சத்­திரக் கவி­தைகள்'" என்ற ஒரு தொகுப்பை கடந்த ஏப்ரல் மாதம் 8ஆம் திகதி வெளி­யிட்டேன். அடுத்து எனது கவிதை தொகுப்பு "பூஞ்­செண்டு" என்ற பெயரில் நூலுருப் பெற்­றது. அதை­ய­டுத்து தான் இந்த  "மின்னும் தார­கைகள்.” இவைதவிர உலக இஸ்­லா­மிய இலக்­கிய மாநாட்டில் நான் சமர்ப்­பித்த "இலங்கை ஊட­கத்­து­றையில் முஸ் லிம் பெண்­களின் பங்­க­ளிப்பு" என்ற ஆய்வுக் கட்­டு­ரையும் கொழும்பு பல்­க­லைக்­க­ழக பத்­தி­ரி­கைத்­துறை டிப்­ளோமா பாட­நெ­றிக்­காக என்னால் சமர்ப்­பிக்­கப்­பட்ட "எயிட்ஸ் நோயும்- பெண்­களும்" என்ற ஆய்­வுக்­கட்­டு­ரையும்   நூலு­ருப்­பெற தயா­ராக உள்­ளன. 

அத்­தோடு உடுவை எஸ்.தில்லை நட­ரா­ஜாவின் "கடற்­கன்னி", "மந்­தி­ரக்­கண்­ணாடி", "பேசும் பேனா" போன்ற மூன்று சிறுவர் நூல்களையும் சிங்­கள மொழியில் மொழி­பெ­யர்த்­துள்ளேன். எனது கணவரின் புதுக்கவிதைகளை தற்சமயம் சிங்களத்தில் மொழிபெயர்ப்பு செய்து கொண்டிருக்கிறேன். இறைவன் நாடினால் அந்த சிங்கள மொழி பெயர்ப்புக் கவிதைத் தொகுப் பும் நூலாக வெளிவரும் 

எதிர்வரும் 11 ஆம் திகதி நடை பெறவுள்ள உங்களது நூல் வெளி யீட்டு நிகழ்வுகளின் சிறப்பு பற்றி?

இலங்கை முஸ்லிம் பெண் எழுத்தாளர்கள் பற்றிய எனது ஆய்வு நூலான "மின்னும் தாரகைகள்" மூன்றுஅத்தியாயங்களுடன் 460 பக்கங்களுடன் ஒரு காத்திரமான நூலாக வெளிவருகிறது.    கொழும்பு – சங்கராஜ மாவத்தை யில் அமைந்துள்ள அல் –ஹிதாயா முஸ்லிம் மகா வித்தியாலய பஹார் தீன் மண்டபத்தில் இந் நிகழ்வு நடை பெறவுள்ளது. மலையகத்தின் முன்னணி எழுத் தாளரான கலாபூஷணம் நயீமா சித்தீக் தலைமையில் நடைபெறும் இந் நிகழ்வில் முன்னாள்  அமைச்சர் ரவூப் ஹக்கீம்  பிரதம அதிதியாகக் கலந்து கொள்ளவுள்ளார். 

அது மாத்திரமன்றி சிறப்பதிதிகள் மற்றும் பிரமுகர்கள் பலரும் கலந்து கொண்டு சிறப்பிக்கும் இந்த விழா வில் இந் நூலில் இடம்பெற்றுள்ள  எழுத்தாளர்களும் கலந்துகொண்டு சிறப்பிக்க வேண்டும் என்பதே என் வேணவா!  இலக்கிய  நண்பர்கள்  உட்பட அனைவருக்கும் இந்த விழாவில் கலந்துகொண்டு சிறப்பிக்குமாறு அழைப்பு விடுக்கிறேன் என்றார்.

நன்றி வீரகேசரி- சங்கமம் (03/11/2018)

நாமே உருவாக்கிக் கொண்ட ஜனநாயகத்தை நாமே கேலி செய்யும் நிலையில் தான் இன்றைய நாளில் வாழ்ந்து கொண்டிருக்கிறோம். ஒரு கிழமைக்கு முன்னால் நமது பாராட்டைப் பெற்றவர்களை நாமே தூற்றுகிறோம். கடந்த வாரம் விமர்சிக்கப்பட்டவர்கள் இந்த வாரம் பரவாயில்லை என்ற நிலைக்கு யோசிக்க வைக்கிறார்கள். அடுத்த வாரம் என்னவாகும் என்ற எதிர்பார்ப்பு அதிகரித்திருக்கும் நிலையில்  அவ்வப்போது எதிர்பாராத நிகழ்வுகள்...

இது இவ்வாறிருக்க தோட்டத் தொழிலாளர்களின் சம்பளப் பிரச்சினையை முன்வைத்து நாடெங்கிலும் தொழிலாளர்களுக்கான ஆதரவுப் போராட்டங்களை முன்னெடுத்து வந்த நிலையில் நாட்டின் தேசிய அரசியலில் ஏற்பட்ட நிலைமாற்றம் அதனைப் பின்தள்ளி விட்டது என்றே சொல்ல வேண்டும்.  கடந்த வாரங்களில் ஊடகங்களில் அந்தப் போராட்டங்களுக்கு வழங்கிய முன்னுரிமைகளை தற்போது காணமுடியவில்லை. ஆனாலும் தோட்டத் தொழிலாளர்களின் சம்பள விடயம் தொடர்பில் சாத்தியமான எந்த அறிவிப்பும் வரவில்லை. 

ஒக்டோபர் புரட்சி என உலகப் புகழ்பெற்ற தொழிலாளர் வர்க்கப் புரட்சி இடம்பெற்ற அதே மாதத்தில் இலங்கையின் முக்கிய தொழிலாளர் வர்க்கமான தோட்டத் தொழிலாளர்களுக்காக  அதே  ஒக்டோபர்  மாதத்தில் கொழும்பில் ஒரு புரட்சி செய்யப்பட்டது. இது தோட்டத் தொழிலாளர்களுக்கான புரட்சி போராட்டம் என்பது ஒருபுறம் இருக்க தோட்டத் தொழிலாளர்களின் அடுத்த தலைமுறையினர் வேறு தொழில் துறைகளில் ஈடுபட்ட வண்ணம் தலைநகரில் தம் பெற்றோருக்காகத் திரண்டனர் என்பது குறிப்பிட்டுச் சொல்ல வேண்டியது. 

இதனையடுத்து சிங்கள, ஆங்கில ஊடகங்கள் தோட்டத் தொழிலாளர்களின் சம்பளப் பிரச்சினை குறித்துப்  பேசுவதற்கு ஏதுவாக இருந்தது. இது தேவையான ஒன்றாகவும் இருந்தது. இந் நாட்டின் தேசிய பிரச்சினையாக தெரியவரும் போதும் அது ஏனைய மொழி பேசும் மக்களிடம் செல்லும்போதும் பிரச்சினையின் பரிணாமம்  வேறு வடிவத்தைப் பெறுவதை அவதானிக்க முடியும்.

சில அரசியல் கட்சிகளும் அவர்களின் வழிவந்தவர்களும் இந்த இணைய வழி ஏற்பாட்டு போராட்டத்துக்குள் மூக்கை நுழைத்ததும் முன்கூட்டியே ஊடகப் போர்வையில் சில ஒழுங்கமைப்புகளைச் செய்தமையும் திட்டமிட்டே செய்தியாக்கப்படல் வேண்டும் என சில்லறை ஏற்பாடுகளைச் செய்ததும்  எடுபட்டதாகத் தெரியவில்லை.

எது எவ்வாறெனினும் அன்றைய போராட்டத்தில் ஒரு சிறு குழுவைத் தவிர அரசியல் நோக்கமின்றி உணர்வுடன் ஒன்று சேர்ந்த இளைஞர், யுவதியினரே பெருந்திரளாக திரண்டிருந்தனர் என்பதே உண்மை. அரசியல் நோக்கம் கொண்ட அந்தக் கும்பலையும் அவர்கள் ஆடிய நாடகத்தையும் விட்டு ஏனைய அனைத்து உணர்வுபூர்வமான இளைஞர், யுவதிகள் முன்னே இன்று எழுந்து நிற்கும் கேள்விகள் என்ன என்பதே இப்போதைய கேள்வி.

இன்று நாட்டில் வரலாறு முன்னெப்போதும் காணாத ஓர் அரசியல் கிளர்ச்சி நிலை தோன்றியிருக்கும் போது ஊடகங்களும் பொதுமக்களும் அதன்பால் ஈர்க்கப்பட்டிருப்பதில் ஆச்சரியப்படுவதற்கில்லை. எனினும் இந்தக் காட்சி மாற்றங்களினூடாக தோட்டத் தொழிலாளர்களின் சம்பளப் பிரச்சினையைத் தீர்த்து வைக்கக்கூடிய மையங்களில் மாற்றம் ஏற்பட்டிருக்கின்றது என்பது இன்னொரு பக்கம் பார்க்க வேண்டியது.

கூட்டு ஒப்பந்தத்தில் கைச்சாத்திடும் பிரதான தொழிற்சங்கமான இலங்கை தொழிலாளர் காங்கிரஸ் தலைவரான ஆறுமுகன் தொண்டமான் அமைச்சராகியுள்ளார். எனவே முன்பைவிட அவருக்கான அதிகாரங்கள் அதிகரித்திருக்கின்றன. மகிழ்ச்சி. மறுபுறம் இலங்கை தேசிய தோட்டத் தொழிலாளர் சங்க பொதுச் செயலாளராக இருந்த வடிவேல் சுரேஷ் பெருந்தோட்டக் கைத்தொழில் துறை இராஜாங்க அமைச்சராகியுள்ளார். அத்துடன்  இ.தொ.கா.வுடன் கைகோர்த்து செயற்படவுள்ளதாகவும் தகவல்கள் கசிந்துள்ளன. 

இனி அவர் அத்தகைய செயலாளர் பதவியில் இல்லாதபோதும் சம்பளப் பிரச்சினையை முன்வைத்தே பேச்சுவார்த்தையில் பங்குகொள்ளும் பெருந்தோட்டப் பிராந்திய கம்பனிகள் அனைத்தையும் மேற்பார்வை செய்யும் பெருந்தோட்டத் துறை முகாமைத்துவ மேற்பார்வைப் பிரிவு (PMMD) இவரது அமைச்சு அதிகாரத்துக்குக் கீழாகவே வரும். மூன்றாவது தரப்பாக கலந்துகொள்ளும் எஸ்.ராமநாதன் லங்கா சமசமாஜக் கட்சியின் தோட்டத் தொழிலாளர் சங்கப் பிரதிநிதி. பேராசிரியர் திஸ்ஸ விதாரண தலைமையிலான சமசமாஜக் கட்சி, பிரதமராக தெரிவு செய்யப்பட்டுள்ள மஹிந்த ராஜபக்‌ஷ அணி ஆதரவுக் கட்சி.

எனவே மூன்று தரப்பினருக்கும் பிரதமராக மஹிந்த ராஜபக்‌ஷ அமையப்பெற்றுள்ள சந்தர்ப்பத்தில் தொழிலாளர்களுக்கு 1000 ரூபா அடிப்படைச் சம்பளத்தையும் இதர கொடுப்பனவுகளையும் பெற்றுக் கொடுக்கும் சந்தர்ப்பம் கைநழுவி செல்லக் கூடாது. என்னதான் ஊடகங்கள் தேசிய அரசியல் நிலைக்குள் மூழ்கி நின்றாலும் தொழிலாளர்களுக்கான தொடர்ச்சியான அழுத்தமும் இளைஞர்களின் பக்கத்தில் இடைவிடாது தொடர்ந்தால் மாத்திரமே சாத்தியமாகும்.

தவிரவும் கொழும்பில் கூடிய இளைஞர்கள் மலையக இளைஞர்கள் என்ற கணிப்பு "அவர்கள் எப்படி... இப்படி....?" என்னும் எண்ணத்தையே கொண்டிருக்கச் செய்துள்ளது. இது எதிர்கால மலையகம் குறித்த அசட்டுப் பார்வை என்றும் கொள்ளலாம். இன்றைய நிலையில் மலையகத் தலைமைகள் எடுக்கும் நிலைப்பாடுகளை காலிமுகத்திடலில் ஒன்றுகூடிய இளைஞர்கள் கவனமாக அவதானிக்க வேண்டும். அன்றைய நாளில் அரங்கேற்றப்பட்ட நாடகம் போலவே இன்றும் பல நாடகங்கள். நாளைய மலையகம் நாடகங்களால் தீர்மானிக்கப்பட முடியாதது.

 காலிமுகத் திடல் உணர்வுக் கூட்டமும் ஒரு நாளோடு முற்றுப் பெற்று விட முடியாது. ஓரிடத்தில் ஒன்றுசேர்ந்து கோஷம் எழுப்பாதபோதும் உணர்வால் மாறாது ஒன்றிணைந்து செயற்பட்டால் மாத்திரமே தோட்டங்களை விட்டு வெளியே வந்த தொழிலாளர் பிள்ளைகளும் நாளைய மலையகத்துக்கு தலைமை கொடுக்க முடியும். கொடுக்க வேண்டும். இன்றைய கட்சித் தாவல்களை எள்ளி நகையாடுவது மட்டுமல்ல, இதனால் தோன்றும் காட்சி மாற்றங்களை எதிர்கொள்ள கற்றுக்கொள்ள வேண்டிய காலமும் இதுவே.

நன்றி  வீரகேசரி (01/11/2018)

ஒவ்வொரு சர்வதேச தினம் வரும் போதும் அந்தந்த விடயங்கள் 'உரிய தினத்தில்' மாத்திரம் நினைவுபடுத்தப்படுவது போல கூட்டு ஒப்பந்தம் எனும் அடிமைச் சாசனம் இரண்டு வருடங்களுக்கு ஒரு முறை அதுவும் அது காலாவதியாகும் சில வாரங்களுக்கு முன்பிருந்து மாத்திரம் பேசப்பட்டு வருவது வழமையாகி விட்டது. அது போல்தான் 2016ஆம் ஆண்டு ஒக்டோ பரில் செய்யப்பட்ட ஒப்பந்தம்  தற்போது காலாவதியாகிவிட்ட நிலையில், அது பற்றிய பேச்சுவார்ததைகள் சுற்றுக்களின் அடிப்படையில் நடைபெற்றுக் கொண்டிருப்பதுடன் அதுவும் ஒரு பழைய பல்லவியே. 

ஒவ்வொரு ஒப்பந்தக் காலப்பகுதியில் பேசப்படும் விடயங்களே தற்போதும் மீள் சுழற்சி முறையில் இடம்பெற்றுக் கொண்டிருக்கின்றன. தோட்டத் தொழிலாளர்களும் தமது சமபளப் பணம் ஆயிரம் ரூபாவாக அதிகரிக்கப்பட வேண்டும் என்ற கோரிக்கையை வலியுறுத்தி தொழிற்சங்க பேதமின்றி அனைவரும் நாளாந்தம் ஏதோ ஒரு வகையில்  அழுத்தம் கொடுக்கின்றனர். 

இலங்கையின் தேசிய பொருளாதாரத்தில் மிக முக்கியக் கூறாக விளங்கும் தேயிலை தொழிற்றுறையினர் மாத்திரம் தமது நாளாந்த வேதன அதிகரிப்புக்காக ஒவவொரு காலத்திலும் வீதிக்கு இறங்கி தமது கோரிக்கைகளை முன்வைத்து கடைசியில் ஏமாற்றமடைந்தும் விடுகின்றனர். இவவாறான தொடர் நிலை பெரிதும் கவலைக்குரியதே...

இந்நிலையில், தற்போது கூட்டு ஒப்பந்தப் பேச்சுவார்த்தைகள் இடம்பெற்று வருகின்ற நிலையில் அதனோடு இணைந்து இனனுமொரு ஒப்பந்தத்திலும் தாம் கைச்சாத்திடுவதாகவும் அதில் நாட் சம்பளம் தவிர்ந்த ஏனைய விடயங்கள் குறித்து குறிப்பிடப்பட்டுள்ளதாகவும் அவற்றை ஆராய கூட்டு ஒப்பந்தத்தில் கைச்சாத்திடும் தொழிற்சங்கங்கள் குழு ஒன்றை அமைத்து ஆராய்ந்து வருவதாகவும் இலங்கைத் தேசிய தோட்டத் தொழிலாளர் சஙக.ே த்தின் பொதுச் செயலாளரும் பதுளை மாவட்ட பாராளுமன்ற உறுப்பினருமான வடிவேல் சுரேஷ் ஊடகங்களுக்கு கருத்துத் தெரிவித் துள்ளார். 

இவ்வாறான ஒப்பந்தம் ஒன்று இருப்பின் அதன் முக்கியத்துவம் குறித்தே இந்த வாரம் அலசல் ஆராய்கிறது.

கூட்டு ஒப்பந்தப் பேச்சுவார்த்தைகள் குறித்தே முழுமையான ஊடகக் கவனம் திரும்பியிருக்கும் இந்த நாளில் பாராளுமன்ற உறுப்பினர் வடிவேல் சுரேஷ் வெளிப்படுத்தியிருக்கும் இந்த இரண்டாம் ஒப்பந்தம் பற்றிய தகவல்கள் மிக முக்கியமானவை.   ஒப்பந்தத்தில் ஈடுபடும் இரண்டு தரப்பினருமே இந்த இரண்டாம் ஒப்பந்தம் பற்றி வெளியே விடாது இருந்தனர். இப்போது ஒப்பநதத்தில் கைச்சாத்திடும் ஒரு தரப்பிலிருந்து இந்தத் தகவல் கசிந்திருப்பது அத்தகைய ஒப்பந்தம் ஒன்று இருப்பதை உறுதிப்படுத்துவதாக உள்ளது.

அத்தகைய ஒப்பந்தத்தின் உள்ளடக்கம் பற்றி  ஊகிக்கக் கூடியதாக உளளது. சம்பளம் தவிர்ந்த பிற விடயங்கள் குறித்து அதில் பேசப்பட்டு இருக்கலாம். அத்தகைய பிற விடயங்களுக்கு கம்பனிகள் தமது நிதியை ஒதுக்குவதாகக் காரணம் காட்டி நாட் சமபளத் தொகையை அதிகரிக்க மறுக்கின்றன. கம்பனிகளின் ஆண்டறிக்கையில் காட்டப்படுகின்ற இலாப புள்ளி விபர ங்களும் சமபளப் பேச்சுவார்ததைகளில் அவர்கள் கூறும் கதைகளும் முரண்பட்டவை. எனவே இரண்டாம் ஒப்பந்தம் குறித்த விடயங்கள் வெளிப்ப டுத்தப்படல் வேண்டும். 

கூட்டு ஒபபந்த முறை மீளாய்வு செய்யப்படல் வேண்டும் என 2016ஆம் ஆண்டு பாராளுமன்றில் ஒத்திவைப்புவேளை பிரேரணை ஒன்று கொண்டுவரப்பட்டது. நுவரெலியா மாவட்டப் பாராளுமன்ற உறுப்பினர் எம். திலகராஜ் ஒத்திவைப்பு வேளை பிரேரணையில் கூட்டு ஒபபந்தம் செய்யப்பட்ட கால இடைவெளி களையும் அதில் காணப்படும் முரண்பாடான விபரங்களையும் சுட்டிக்காட் டியிருந்தார். 

அந்த விவாதத்தில் கலந்து கொண்டு உரையாற்றும் பேோது  பதுளை மாவட்ட பாராளுமன்ற உறுபபினர் வடிவேல் சுரேஷ் கூட்டு ஒபபந்தம் கைச்சாத்திடப்பட்டு உரிய சமபளம் வழங்கப்படாத விடத்து தான் சபையில் தீமூட்டி தறகொலை செய்வதாக அதிரடியாகத் தெரிவித்தார். அன்று கொண்டுவரப்பட்ட ஒத்திவைப்பு வேளை பிரேரணையைவிட  பெற்றோல் விடயமே அன்று பிரபலமானது. ஏன் இன்றும் கூட 'பெற்றோல்' விடயம் பிரபலமாகவே உள்ளது.   

இன்றும் கூட வேறு யார் மறந்தாலும் அவரே அவ்வப்போது அந்தப் பெற்றோல் விடயத்தையும் தனது தீககுளிப்பு அறிவிப்பையும் விடுவதாக இல்லை. கடந்த வாரம் பண்டாரவளை அம்பிட்டிகந்த இளஞ்செழியன்புரம் வீடமைப்புத் திட்ட திறப்பு விழாவின்போதும் இந்தப் பெற்றோல், தீக்குளிப்பு விடயங்களை அவர் நினைவுப்படுத்திப் பேசியிருந்தமை சுட்டிக்காட்டத்தக்கது. 

கூட்டு ஒப்பந்தப் பேச்சுவார்த்தைகள் இடம்பெற்று வருகின்ற நிலையில் அதனோடு இணைந்து இனனுமொரு ஒப்பந்தத்திலும் தாம் கைச்சாத் திடுவதாகவும் அதில் நாட் சமபளம் தவிர்ந்த ஏனைய விடயங்கள் குறித்து குறிப்பிடப்பட்டுள்ளதாகவும் அவற்றை ஆராய கூட்டு ஒப்பந்தத்தில் கைச்சாத் திடும் தொழிற்சங்கங்கள் குழு ஒன்றை அமைத்து ஆராய்ந்து வருவதாகவும் இலங்கைத் தேசிய தோட்டத் தொழிலாளர் சஙகத்தின் பொதுச் செயலாளரும்  வடிவேல் சுரேஷ் எம்.பி.  ஊடகங்களுக்கு கருத்துத் தெரிவித்தும் உள்ளார் . 

கூட்டு ஒப்பந்தத்தில் கைச்சாத்திடும் தரப்பு என்கின்ற நிலையில் இருந்து கொண்டு வடிவேல் சுரேஷ் விடுத்திருக்கும் இந்த அறிவிப்பு முக்கியமானது. இதுவரை காலம் கைச்சாத்திட்ட தரப்பு வெளியிடாத ஒரு விடயத்தை வெளியே கொண்டு வந்தமைக்கு அவர் பாராட்டப்பட வேண்டியவராக இருந்தாலும் வெறுமனே அதனைச் சொல்லிவிட்டுப் போகாமல்  வெளிப்ப டுத்த வேண்டிய கடப்பாடும் இருககின்றது. 

அது மாததிரமன்றி பெற்றோல் கொண்டுவருவதற்கு காட்டுகின்ற ஆர்வத்தைக் குறைத்து அதற்குப் பதிலாக இந்த இரண்டு ஒப்பந்தங்களையும் சபையில் சமர்ப்பித்தால் அது விவாதத்துக்கு உள்ளாகும். அதன் மூலம் தோட்டத் தொழிலாளர்களின் சமபளப் பேசசுவார்த்தையில் முக்கிய திருப்பத்தை ஏறபடுத்த முடியும்.

இது இவவாறிருக்க, தீபாவளி முற்பணம் பததாயிரம் பெறறுக்கொடுக்க உத்தேசித்துள்ள அறிவிப்பும் தற்போது வெளி வந்துள்ளது.  ஏற்கெனவே தான் பிரதமரைச் சந்தித்து தீபாவளி முற்பணம் ரூ.10,000/---= பெற்றுக்கொடுக்க கலந்துரையாடியதாக மலைநாட்டு புதிய கிராமங்கள் உட்கட்டமைப்பு, சமுதாய அபிவிருத்தி அமைச்சர் பழனி திகாம்பரம் ஊடகங்களுக்கு அறிவித்ததும், இலங்கைத் தொழிலாளர் காஙகிரஸும் கமபனிகளிடம் பேசி அதனைப் பெற்றுக்கொடுப்பதாக அதன் உப தலைவர் எஸ். அருள்சாமி ஊடகங்களுக்குத் தெரிவித்துள்ளார்.

கூடவே அத்தகைய கோரிக்கைகளை முதலாளிமார் சமமேளனத்திடமும் அரச பெருந்தோட்ட கூட்டுத்தாபனத்திடமும் தாம் கோரியதாக இலங்கை தொழிலாளர் காங்கிரஸ் தலைவரும் நுவரெலியா மாவட்ட பாராளுமன்ற உறுப்பினருமான ஆறுமுகன் தொண்டமான் எழுதிய கடிதமும் இப்போது வெளிப்படுத்தப்பட்டுள்ளது.

இவ்வாறான கடிதங்கள் எல்லாம் வெளியே வரும் போது இரண்டாம் ஒப்பந்தம் ஒன்று இருந்தால், கூட்டு ஒப்பந்தத்தில்  கைச்சாத்திடும் சங்கங்கள் அதனை வெளிப்படுத்த வேண்டும். இது குறித்தும் ஊடகங்கள் தமது கவனத்தை அதிகம் காட்டுவது அவசியம். இரண்டாவது ஒப்பந்தத்தை வெளியே கொண்டு வருவதற்கும் மக்களின் சார்பாக ஊடகங்கள் கவனம் செலுத்த வேண்டும். கூட்டு ஒப்பந்த முறையில் முன்னேற்றத்தை ஏற்படுத்த இந்த இரண்டாவது ஒப்பந்த ஷரத்துகள் பயன்படக் கூடும்.

நன்றி வீரகேசரி - 18.10.2018

"ஊடகம் என்பது சுதந்திரமானதும் சுயாதீனமானதும் பொறுப்புடையதும் விழுமியங்களைக் கொண்டதுமானதாக இல்லாதபோது ஊடகவியலின் சக்தி பற்றிய வினா எழுப்புவதில் அர்த்தமில்லை" என்கிறார்  ஜனநாயகத்துக்கும் சட்டத்துக்குமான கனடாவின் மத்திய நிலையத்தின் பணிப்பாளர் டொபி மென்டேல்.

மேற்படி கருத்து நிலையில் நின்று ஊடகவியலையும் அதன் தற்காலப் போக்கையும் அலசி ஆராய்வதே இக் கட்டுரையின் நோக்கமாகிறது. 

கடந்த மாதம் 27 ஆம் திகதி முதல் 30ஆம் திகதி வரை இலங்கையில் நடைபெற்ற  "ஊடக சுதந்திரத்துக்கும் சமூகப்பொறுப்புக்குமான கொழும்பு பிரகடனம்" என்னும் சர்வதேச மாநாட்டில் பிரதான பேச்சாளராக கலந்துகொண்ட ஜனநாயகத்துக்கும் சட்டத்துக்குமான கனடாவின் மத்திய நிலையத்தின் பணிப்பாளரான டொபி மென்டேல் ஊடகம் என்பது சுதந்திரமானதும் சுயாதீனமானதும் பொறுப்புடையதுமாக மாத்திரமின்றி ஒழுக்க விழுமியங்களையுடையதாகவும் இருத்தல் வேண்டும் என்பதை வலியுறுத்தினார்.

ஊடகவியலுக்கு ஒரு சக்தி உண்டு என்பதை மறுப்பதற்கில்லை. ஆனாலும் மாறிவரும் உலகில் சமூக ஊடகங்களின் ஆதிக்கம் அதிகரித்துள்ள நிலையில் வெகுஜன ஊடகத்துறை அதன் சக்தியை கொண்டியங்குவது சவாலுக்குரியதே. 

இதற்கான அவசியத்தை வலியுறுத்துவதாகவும் அதனை கண்டடைவதற்கான வழிமுறையாகவுமே "கொழும்பு பிரகடனம்" அமைகிறது என்பதாகவே இலங்கை பத்திரிகை ஸ்தாபனத்தின் ஏற்பாட்டில் 4 நாட்கள் நடைபெற்ற மாநாட்டின் இறுதியில் அவர் விடுத்த அறிக்கையில் தெரிவிக்கப்பட்டுள்ளது. 

அவதூறுக் குற்றச்சாட்டுக்களை முன்வைத்து அதிகாரமிக்க தனிநபர்களினால் பத்திரிகைகள், பத்திரிகை ஆசிரியர்கள், ஊடகவியலாளர்கள் மீது நடத்தப்பட்ட தாக்குதல்கள்,  தொடுக்கப்பட்ட வழக்குகளின் அடிப்படையே கொழும்பு பிரகடனத்துக்கான தோற்றுவாயானது. ஊடக சுதந்திரத்தின் மீதான தாக்குதல்களே ஊடகச் சமூகம் ஓரணியில் திரண்டு போராடுவதற்கான களத்தை தோற்றுவிக்கிறது. இதனாலேயே 1998 ஆம் ஆண்டு கொழும்பு பிரகடனத்தை ஊடக சமூகம் ஏற்றுக்கொண்டது.

 ஊடக சுதந்திரத்தை  வலியுறுத்தும் சட்ட, கொள்கை சூழலை உருவாக்குவதிலும் சர்வதேச சட்ட பாதுகாப்பையும் அரசியலமைப்பு ரீதியான ஏற்பாடுகளை செய்வதிலும் ஒரு முக்கிய மாற்றத்தை அது செய்துள்ளது. ஆனாலும் கொழும்பு பிரகடனத்தைக் கொண்டு மேற்கொள்ளப்பட்ட நடவடிக்கை  ஒன்றை அன்றும் இன்றும் எங்கும் காண முடியாமல் உள்ளது. 

உதாரணமாக நேபாளத்தில் கொழும்பு பிரகடனத்தை தமது அரசியலமைப்பு தயாரிப்பின்போது ஒரு தரவு மூலமாக பயன்படுத்தியதையும் இலங்கை அவதூறுக்கு எதிரான குற்றவியல் சட்டத்தை மீளப்பெற்றதையும் மாத்திரமே கொள்ள முடியும். இதனை மேற்கொண்ட முதலாவது பொதுநலவாய அமைப்பு நாடுகளில் ஒன்று என்பதற்கு அப்பால்  ஐக்கிய ராஜ்ஜியம்,  கானா போன்ற நாடுகளில் சில சிறிய மாற்றங்கள் இடம்பெற்றுள்ளன. 

இந் நடவடிக்கைகளுக்கு அப்பால் இலங்கையில், இலங்கை பத்திரிகை ஸ்தாபனம் மற்றும் அதன் உறுப்பு அமைப்புகள், இலங்கை இதழியல் கல்லூரி, இலங்கை பத்திரிகை முறைப்பாட்டு ஆணைக்குழு போன்றவை இலங்கையில் உருவாக்கப்பட்டதை இம் மாநட்டில் உரையாற்றிய பலரும் வரவேற்றனர். இவை உருவாக்கப்பட்டது மாத்திரமின்றி நடைமுறையில் இயங்கிக்கொண்டிருப்பது முக்கியமானது என்றும் தெரிவித்தனர். 

ஓலி(ளி)பரப்புத்துறையும் இணைய (Online) ஊடகத்தையும் இதில் இணைத்துக்கொள்வது குறித்து தொடர்ச்சியாக வலியுறுத்தி வருகின்றபோதிலும் அது இன்னும் பெரிதாக நடைபெறவில்லை. இலங்கை பத்திரிகை ஸ்தாபனத்தின் உறுப்புரிமை அமைப்புகளாக இத்தகைய ஊடகத்துறைகளையும் இணைக்கும் பட்சத்தில் ஊடகத்துறையின் வளர்ச்சிக்கு அது பலமாக அமையும். இத்தகைய அமைப்புகளை கட்டியெழுப்புவதற்கு அப்பால் பத்திரிகைப் பேரவை, பத்திரிகைப் பேரவை சட்டம் போன்றவற்றை மீளப்பெறச் செய்வதையும் வலியுறுத்தவேண்டும். 

தற்காலத்தில் துறைசார் ஊடகத்துக்கும் சமூகவலைத்தள ஊடகத்துக்குமான இடைவெளியை பிரித்துப்பார்ப்பது கடினமாகியுள்ளது. தவறான தகவல்களும் வதந்திகளும் கூட செய்திகளாகி விடுகின்றன. ஊடக மற்றும் தகவல்சார்  கல்வி என்பது ஊடகத்தினதும் அது தரும் தகவல்களினதும் நம்பகத்தன்மையை பொதுமக்களிடத்தில் கொண்டு சேர்க்க உதவியாக இருக்கும். 

கொழும்பு பிரகடனத்தின் சில பக்கங்கள் இலங்கை அரசாங்க ஊடகங்களில் நிலவும் பிரச்சினைகளை சுட்டிக்காட்டுவதாக உள்ளது. ஏரிக்கரை பத்திரிகைகள், அரசாங்க ஒலி(ளி)பரப்பு ஊடக நடைமுறைகள் போன்றன பொதுச்சேவை என்பதற்கு அப்பால் அவை இன்னும் அரசாங்கத்தின் ஊதுகுழல்களாக இயங்குவதையே காட்டிநிற்கின்றன. 

அரசாங்க ஊடகங்களின் வகிபாகம் என்பது நம்பகரமான பிரதான செய்தி மூலம் என்பதற்கு அப்பால் அதில்  நிலைமாற்ற தேவைப்பாடு உண்டு என்பதை மறுப்பதற்கில்லை. வெளிப்பாட்டு சுதந்திரம், ஊடக சுதந்திரம் என்பன தொடர்பாக பேசும்போது பாதுகாப்பு பற்றி அதிகம் உணரப்பட்டது. 

ஊடகவியலாளர்கள் மீதான தாக்குதல்களினூடாக அவர்களைக் கொல்லும் முன்னிலை நாடுகளில் ஒன்றாக இருந்த துரதிர்ஷ்ட நிலை இன்று இலங்கையில் பின்தள்ளப்பட்டுள்ளது. எனினும் அவை இன்னும் முடிவுக்குக் கொண்டுவரப்படவில்லை. இன்றும் கூட அச்சுறுத்தல்களும்  தாக்குதல்களும் இடம்பெறுகின்றன. 

 இலங்கையிலும் உலகளவிய ரீதியிலும் தகவல் உரிமைச் சட்ட செயற்பாட்டாளர்கள் மீதான தாக்குதல்கள் தேசிய ரீதியானதும் சர்வதேச ரீதியானதுமான மாற்று நடவடிக்கைகளை மேற்கொள்ளத் தேவையான தளத்தை உருவாக்கும் முறைமையை வேண்டி நிற்கின்றது. 

மாநாட்டின் இரண்டாவது நாளானது "சர்வதேச தகவல் அறியும் உரிமை" நாளாக அமைந்தது. உலகளாவிய ரீதியாக மக்கள் தகவல் அறியும் சட்டங்களைக் கொண்டாடும் நாளாகவும் அமைந்தது. இலங்கை தகவல் அறியும் உரிமைக்கான ஆணைக்குழுவின் தலைவர் இலங்கை அதற்காக மேற்கொண்ட முன்னேற்றகரமான நடவடிக்கைகள் குறித்தும் அரசியலமைப்பின் உறுப்புரிமை 14  ஊடாகவும் 2016 ஆம் ஆண்டு தகவல் உரிமைச்சட்டத்தை நடைமுறைப்படுத்துவதற்கான பலமான ஏற்பாடு களையும் சுட்டிக்காட்டினார். எது எவ்வாறாயினும் தகவல் அறியும் உரிமைச் சட்டம் தொடர்பிலான மதிப்பாய்வில் இலங்கை மூன்றாம் நிலையில் இருந்து நான்காம் நிலைக்கு தள்ளப்பட்டுள்ளது.

அண்மித்த நாடான ஆப்கானிஸ்தானிலும் தகவல் அறியும் உரிமை சட்டம் உலகின் முதன்மையானதாக அடையாளம் காணப்பட்டுள்ளது. அதேநேரம் இலங்கையில் தகவல் அறியும் உரிமை சட்டத்தை நடை முறைப்படுத்த எடுக்கும் முயற்சியை குறைத்து மதிப்பிடமுடியாது. 

சுயாதீனமானதும் பலமானதுமன தகவல் அறியும் உரிமைக்கான ஆணைக்குழு அதனை தலைமை ஏற்று நடத்துகிறது. அது நிறைவேற்றியுள்ள பல தீர்மானங்கள்  கொழும்பைத் தளமாகக் கொண்ட சிவில் சமூக குழுக்களிடமிருந்து அல்லாமல் நாட்டின் பலதுறைகளிலும் வாழும் மக்களின் கோரிக்கைகளின் பால் நிறைவேற்றப்பட்டுள்ளது. மக்கள் ஆதரவுள்ள பலமான தகவல் அறியும் சட்டமானது அத்துறை எதிர்நோக்கும் சவால்களைப் பின்தள்ள அவசியமானது. 

மாநாட்டின் மிக முக்கிய சொல்லாடலாக அமைந்தது. "போலிச் செய்திகள்" என்ற ஒன்று இல்லை என்பதாகும். "போலிச் செய்திகள்" என்னும் நாணயம் ஊடக எதிரிகளால் சுரண்டப்படுகிறது. குறிப்பாக ஊடகங்களைத் தாக்குவதற்கு பயன்படுத்தப்படுகின்றது. சமூக ஊடகங்களில் வரும் திட்டமிடப்பட்ட செய்தியல்லாத தவறான தகவல்களுக்கு மீளவும் உயிரூட்டி இரண்டாவது தடவையாகவும் அதனை வெளிப்படுத்துவதை ஊடகங்கள் நிறுத்த வேண்டும். சமூக ஊடகங்களில் இருந்து மரபுசார் ஊடகங்களை வேறுபடுத்தி அறியும் இடமாக அது அமைய வேண்டும். 

ஊடகங்கள் வாயிலாக பணத்தைத் தேடுவதற்கும்  கவனயீர்ப்பைப் பெறுவதற்கும் முயற்சிப்பதிலும் பார்க்க சரியான செய்தியை வழங்குவதற்கான தேவையே அதிகம் இருக்கிறது. நடைமுறை விடயங்கள் தொடர்பில் கவனமாக பெறப்பட்ட தகவல்தேடல் அவசியமானது.  துறைசார் ஊடவியலாளருக்கு உரிய பண்புகளோடு செயற்படுதல் அவசியம். பொறுப்பற்ற விதத்தில் செயற்படுவது தவிர்க்கப்பட வேண்டும். 

புதிய எண்ணிம சூழல் (Digital Environment)  எண்ணிலடங்கா சவால்களை மரபுசார் ஊடகங்கள் மீது சுமத்தியுள்ளது. மரபுசார் ஊடகங்களிலிருந்து நிதியீட்டமானது சமூக ஊடகம் சார்ந்து மாற்றப்பட்டு வருகிறது. செய்திச் சுற்றின் வேகம், எல்லா பிரஜைகளுக்கும் கொண்டுசேர்த்தல், தகவல் கசிவுகள் முதலான சவால்களிலிருந்து மரபுசார் ஊடகத்தைப் பாதுகாக்க வேண்டியுள்ளது. 

நீதிமன்ற அவமதிப்பு சட்ட திட்டங்கள் இருக்கும்போது அதன் நிறை – குறைகளை வெளிப்படுத்துவதில் நியமங்களை உருவாக்கிக் கொள்வதில் உலகளாவிய ரீதியில் சவால்கள் காணப்படுகின்றன. நவீன ஊடக சூழலில் பயிற்சி என்பது மிகுந்த சவாலுக்குரியதாகியுள்ளது. அது மிகவும் யதார்த்தமானதாகவும் இயற்கையானதாகவும் அமைய வேண்டியதாக உள்ளது. அது நுட்பம் சார்ந்ததாக மட்டுமல்லாமல் இதழியல் சார்ந்ததாக வளர்த்தெடுக்கப்பட வேண்டியதாகவுள்ளது. புதிய யுகமானது தொழில்நுட்பம் சார்ந்தது. 

 ரேோபோக்களையும் செயற்கை புத்திகூர்மைகளையும் கூட ஊடகவியல் துறையில் கையாளும் காலம் வெகுதொலைவில் இல்லை. அவை எமக்கு புதிய சவால்களை வழங்குவதாக உள்ளன. இது எங்கே போய் முடியும் என்று கூறமுடியாது. ஊடக நிறுவனங்கள் தமது துறையை நவீனமாகவும் முறையானதாகவும் கையாளும் திறன் கொண்டவையாக மாறவேண்டியுள்ளது.

மாநாடானது ஊடகவியலின் சக்தி என்பதாகவே முடிவுற்றது. எனினும் ஊடவியலின் சக்தி என்பது உண்மையானதா, கற்பனையானதா என்னும் கேள்வி எல்லோர் மத்தியிலும் எழாமல் இல்லை. இது ஒரு தொடர்ச்சியான உரையாடலாக அமையும். ஒரு ஊடகவியலாளர் என்பவர் பார்வையாளராக இருப்பவரல்ல. அவர் கண்காணிப்பாளர் என்பதை உணர வேண்டும் என்னும் வாசகம் இதன்போது உணர்த்தப்பட்டது. 

அத்துடன்  இளம் ஊடகவியலாளர்கள் மத்தியில் வாசிப்புப் பழக்கம் மிகவும் அருகியதாகவே உள்ளது.  எதிர்காலத்தில் சிறப்பான தகைமையான ஊடகவியலாளராக வரவேண்டுமானால் ஆக்கத்திறன் மிக்க ஊடகவியலாளராக இருக்க வேண்டும். இளம் ஆண், பெண் ஊடகவியலாளர்களினதும் ஊடகவியல் மாணவர்களினதும் கருத்தாக அமைந்தது "ஏன் நாங்கள் சிரமமானதும் குறைந்த வருமானத்தைத் தருவதுமான இத் தொழிலில் ஈடுபட வேண்டும்?" என்பதாகும். 

இக் கேள்வி இன்று ஊடகவியலை எதை நோக்கி நகர்த்திச் செல்கின்றது என்பது பற்றி ட்சிந்திக்க வேண்டியுள்ளது. ஊடகவியல் சிரமமான துறையாக கருதுவதால் செய்தி சேகரிப்பு பற்றிய தேடல்கள் குறைந்து கேள்விப்படவற்றையும் முகநூல் அலம்பல்களையும் செய்தியாக்குவதிலும் உட்கார்ந்த இடத்தில் கிடைக்கின்ற தகவல்களை புனைவுகளாக சோடித்து எழுதுதல், ஊடக சுதந்திரம் என்னும் போர்வையில் குறைகளை மாத்திரம் அடையாளம் காணுதல் ஊடகத்துறையின் இயல்பாகிவிட்டிருக்கிறது. 

வருமான நிலையில் நின்று பார்க்கும்போது இலஞ்சம் பெறுவதை தவறு என சுட்டிக்காட்டும் ஊடகத்துறை இலஞ்சமின்றி இயங்குகின்றதா? செய்திகளை பிரசுரிக்க கையூட்டல் பெறப்படுகின்றதா? என்பது போன்ற கேள்விகளையும் ஊடகத்துறை சார்ந்தவர்கள் தம்மைத்தாமே சுயவிமர்சனம் செய்துகொள்ளும் தேவையை உணர்த்துவதாக உள்ளது.  

அரசாங்கத்தையோ அரசியல்வாதிகளையோ நிந்திக்கும் அதே ஊடகம் அவர்களின் அனுசரணைகளை வெவ்வேறு வடிவங்களில் பெற்றுக்கொள்ள   எத்தனித்துக் கொண்டே எவ்வாறு ஊடகவியலின் சக்தியைக் காட்ட முடியும் என்பது கேள்விக்குறியே. பக்கச்சார்பாகவும் நிகழ்ச்சி நிரல்களின் அடிப்படையிலும் ஊடக நிறுவனங்களும் ஊடகவியலாளர்களும் செயற் படுவதால் ஊடக ஒழுக்க விழுமியங்களிலிருந்து விலகிச்செல் கின்றனர் என்பதுவே அர்த்தமாகும். 

எனவேதான் "ஊடகம் என்பது சுதந்திரமானதும் சுயாதீனமானதும் பொறுப்புடையதுமாக மட்டுமல்ல. ஊடக ஒழுக்க விழுமியங்களைக் கொண்டதுமானதாக இல்லாதபோது ஊடகவியலின் சக்தி பற்றிய வினா எழுப்புவதில் அர்த்தமில்லை"  என ஜனநாயகத்துக்கும் சட்டத்துக்குமான கனடாவின் மத்திய நிலையத்தின் பணிப்பாளரான டொபி மென்டேலின் கருத்தை மறுதலிக்க முடியாதுள்ளது.

நன்றி வீரகேசரி - அக். 11. 2018

இலங்கையில் இலக்கிய முயற்சிகளை ஊக்குவிக்கின்ற பணியில் தம்மை ஈடுபடுத்திக் கொண்டிருக்கும் பெயார்வே ஹோல்டிங்ஸ் நிறுவனம்     4ஆவது தடவையாக நடத்தவுள்ள பெயார்வே–2018 தேசிய இலக்கிய விருது விழா எதிர்வரும் ஆண்டு நடத்தப்படவுள்ள நிலையில் அவ்விழாவில் விருதுகளைப் பெறுவதற்கு மும்மொழியிலும் தெரிவுசெய்யப்பட்ட விருதாளர்களின் பெயர்ப்பட்டியலானது கடந்தவாரம் கிங்ஸ்பெரி ஹோட்டலில் நடைபெற்ற  ஊடகவியலாளர் சந்திப்பின்போது அறிவிக்கப்பட்டது. 

"மும்மொழிகளிலும் தெரிவுசெய்யப்பட்ட நாவல்களுக்கே பணப்பரிசில்களும் விருதும் வழங்கப்படும்.   ஒவ்வொரு  மொழியிலும் முதலாவது இடத்துக்குத் தெரிவு செய்யப்படும் தலைசிறந்த  நாவலுக்கு 5 இலட்சம் ரூபா பரிசாக வழங்கப்படும். அதனைத் தொடர்ந்து குறும்பட்டியலுக்குத் தெரிவாகும் நாவலுக்கு ஒரு இலட்சம் ரூபா பணப்பரிசாக வழங்கப்படும்.

முஸ்டின்– இரத்தக்குளியல்,  பிரமிளா பிரதீபன் –- கட்டுபொல்- ,  -தோற்றுப்போனவர்கள், நா.யோகேந்திரநாதன்–    இடிபடும் கோட்டைகள்,  - ஆ.மு.சி.வேலழகன் – பனிச்சையடி முன்மாரியும் சட்டக்கிணறும் 

ஆகிய நாவல்களே விருதுக்கான குறும்பட்டிலில் இடம்பெற்றுள்ளன. 

இவ்வாறு தெரிவுசெய்யப்பட்ட நாவல்கள் பேசிய மையக்கரு, அவற்றின் புனைதிறன், மொழிநடை, அவை வாசகர் மத்தியில் ஏற்படுத்தக் கூடிய தன்மை ஆகியவற்றை அடிப்படையாகக் கொண்டே மேற்படி குறும்பட்டியலுக்குரிய நாவல்கள் எம்மால் விதந்துரைக்கப்பட்டுள்ளன. மேற்படி ஒழுங்குக்கும்  மதிப்பீட்டுக்கும் ஒருவித தொடர்புமில்லை. அது வெறும் பட்டியலே" என்று நடுவர் குழு தெரிவித்திருக்கிறது.

இம்முறை போட்டியில் தமிழ் நாவலை தெரிவு  செய்வதற்கான நடுவர்களாக  கலாநிதி பவித்ரா கைலாசபதி, விரிவுரையாளர் லரீனா அப்துல் ஹக், மென்பொருள் வடிவமைப்பாளர், சமூகசேவகர், எழுத்தாளர் முரளிதரன் மயூரன்  ஆகியோர் செயற்பட்டனர். 

இதேபோல ஆங்கில மொழிமூலம் 4 நாவல்களும் சிங்கள மொழிமூலம் 5 நாவல்களும் குறும்பட்டியலில் தெரிவாகியுள்ளன.  2017 ஆம் ஆண்டு மே மாதம் முதல் 2018 ஆம் ஆண்டு மே மாதம் வரையிலான காலப்பகுதியில் வெளிவந்த நாவல்கள் விருதுக்காக விண்ணப்பிக்கப்பட்டன.  விண்ணப்பத்துக்கமைய 109 சிங்கள நாவல்களும் 12 தமிழ் நாவல்களும் போட்டிக்கு  அனுப்பப்பட்டு 5 நாவல்களே தெரிவுசெய்யப்பட்டுள்ளன.

 இந்தக் குறும்பட்டியலில் இடம்பெற்ற நாவல்கள் அத்தனையும் மீள்

வாசிப்புக்கு உட்படுத்தப்பட்டு எதிர்வ ரும் 2019 ஆம் ஆண்டு  ஜனவரி மாதம் காலி மாநகரத்தில்  நடைபெறவுள்ள பெயார்வே தேசிய இலக்கிய விருது விழாவில் முதலிடத்துக்குரிய வெற்றி யாளர் அறிவிக்கப்பட்டு பரிசு வழங்கப் படும் என்று விழாக் குழுவினர் தெரிவித்துள்ளனர்.

நன்றி வீரகேசரி - சங்கமம்  08/09/2018

இந்திய பேச்சாளர் (Motivation Speaker) பரமன் பச்சைமுத்துவின் 'உறவுகளில் உன்னதம்' என்ற தலைப்பிலான சிறப்பு சொற்பொழிவு நாளை  16 ஆம் திகதி  ஞாயிற்றுக்கிழமை  காலை 10.00 மணிமுதல் பம்பலப்பிட்டி லோறன்ஸ் வீதியில் அமைந்துள்ள சரஸ்வதி மண்டபத்தில் நடைபெற வுள்ளது.

நாவலப்பிட்டி கதிரேசன் மத்திய கல்லூரியின் பழைய மாணவர் சங்க கொழும்பு கிளையின் ஏற்பாட்டில், கொழும்பிலுள்ள பிரபல பாடசாலைகளில் உயர்தரம் பயிலும் மாணவ, மாணவியருக்கும் கொழும்பில் தொழில் புரியும் இளைஞர், யுவதிகளுக்கும் பயனளிக்கும் வகையில் இச்சொற்பொழிவு ஏற்பாடு செய்யப்பட்டுள்ளது. 

இலவசமாக இந்நிகழ்வு நடைபெறவுள்ள நிலையில் 'உறவுகளின்   உன்னதம்'  உட்பட   பலதரப்பட்ட விடயங்களை சிறப்புப் பேச்சாளர் பரமன் பச்சை முத்துவிடம்  உரையாடக்கிடைத்தது. இதுபற்றி அவர் பகிர்ந்துகொண்ட விடயங்கள் எமது வாசகர்களுக்காக...

'உறவுகளின் உன்னதம்' எனும் தலைப் பிலான மலர்ச்சி உரையை நாளை ஆற்றவுள் ளீர்கள். இதுபற்றி எம்முடன் பகிர்ந்து கொள்ள முடியுமா?

தாய், தகப்பன், தம்பி, அண்ணன், தங்கை, மனைவி, மகன், மகள் என்று குடும்பத்தில் தொடங்கி  அத்தை, மாமன், மச்சான் என்று வளர்ந்து நண்பர்கள், உடன் பணிபுரியும் ஊழியத் தோழர்கள் என ஒரு மனிதனை அடுத்த மனிதனோடு இணைத்து வைக்கும் ஒரு கண்ணுக்குத் தெரியா இணைப்பு ‘உறவு’. மனிதன் அடுத்த மனிதனோடு கொள்ளும் உறவே அவனை கற்கால மனிதனிலிருந்து பண்படுத்தி வளர்த்தெடு த்து பெரும் நாகரீகங்களை உருவாக்கியிருக்கிறது. 

உறவு என்பது பால், திணை கடந்து உயிர்களுக்கானது. ஒரு கிளியும் இன்னொரு கிளியும் கொண்டிருக்கும் உறவை பார்த்திருப்பீர்கள். ஒரு புறாவும் இன்னொரு புறாவும் கொண்டிருக்கும் உறவை அறிந்திருப்பீர்கள். யானை தன் குட்டியுடன் கொண்டிருக்கும் உறவை சில காணொளிகளில் கண்டு அசந்து போயிருப்பீர்கள். எல்லா உயிர்களும் தங்கள் இயல்புப்படி உறவுகளை சரியாகக் கையாண்டு நேரிய வாழ்வை கொள்கின்றன.

படைப்பின் உச்சம் என்று சொல்லப்படும் மனிதன் மட்டும் இயல்புக்கு மாறாக உறவுகளை குதறிக் காயப்படுத்திக்கொண்டு வாழ வேண்டியுள்ளது. இங்கே உறவென்பது உன்னதமானது என்று திரும்பத் திரும்ப நினைவுபடுத்தப்பட வேண்டியுள்ளது.  ‘என் உறவுகள் எனக்கு முக்கியம்தான்!’ என்று அவன் அறிந்திருந்தாலும் தினசரி வாழ்வில் சில செயல்களை அல்லது நெறிமுறைகளை அவன் கடைப்பிடித்தால் உறவுகளை மலர்ச்சி பெறச்செய்யமுடியும். அது பற்றியதே இந்த மலர்ச்சி உரை ‘உறவுகளில் உன்னதம்.

கையடக்கத் தொலைபேசியை பார்த்தே உறவுகளின் கேள்விகளுக்கு பதில் அளிக்கும் இந்த டிஜிட்டல் யுகத்தில் மேற்படி விடயப்பரப்பை எவ்வாறு கொண்டு செல்லவுள்ளீர்கள்?

செல்லிடப்பேசி என்பது தவிர்க்க முடியாததாகிவிட்ட இந்த நிலையில், இந்த நிலையிலிருந்து நாம் செய்ய வேண்டியது என்னவென்று பார்க்க வேண்டும். அதை இந்த நிகழ்ச்சி செய்யும். 

டிஜிட்டலை நம்பி வாழும் தலை முறையினர்   தமது    சுயமுன் னேற்றத்

திலிருந்து விலகிச்செல்வதாக இருக்கின்றது. அவர்களின்   சுயமுன்னேற்றத்துக்கு நீங்கள் எவ்வாறான பதிலைக் கொடுப்பீர்கள்? 

டிஜிட்டல் தொழில் நுட்பம் தவறல்ல. ‘மிகினும் குறையினும் நோய் செய்யும்’ என்ற வள்ளுவப் பேராசானின் வாக்கை நினைவில் கொள்ள வேண்டும். நான் தமிழகத்தில் சிதம்பரத்தையடுத்த மணக்குடியில்(கீழமணக்குடி) வளர்ந்த அந்நாட்களில் ‘இலங்கை வானொலி’யை கேட்டே வளர்ந்தேன்.

எந்நேரமும் எங்கள் ஊரில் பெரும்பாலானவர்களின் வீடுகளில் ‘ரேடியோ’ எனப்படும் வானொலி ஒலித்துக்கொண்டேதான் இருக்கும். அதை கேட்டே வளர்ந்தோம். ஒருவேளை அக்கால முதியவர்கள் அன்றைய இளைய தலைமுறையினரைப் பார்த்து ‘எப்ப பாரு ரேடியோ பெட்டிய கட்டிக்கிட்டு கெடக்குது பாரு!’ என்று சொல்லியிருக்கலாம். அன்று வானொலி. இன்று செல்லிடப்பேசி மற்றும் டிஜிட்டல் பரிவர்த்தனை. தவிர்க்க முடியாதுதான். ஆனால், இந்த நிலையில் செய்ய வேண்டியது என்ன என்பதைப் பார்க்க முடியும்.   

இயந்திரமாக உழலும் இந்த யுகத்திற்கு Motivation சம்பந்தமாக பேச்சு, உரையாடல்களை மக்கள் மத்தியில் எவ்வாறு சாத்தியப் படுத்தப்ப டக்கூடியதாக இருக்கும்? 

இயந்திரம் ஆனாலும் மனிதன் மனிதன்தானே. உள்ளே மனிதம் இருக்கத்தானே செய்கிறது. உட லுக்கு உணவும் மருந்துப் பொருள்களும் உதவி செய் வதைப்போல, உள்ளத்திற்கு உத்வேகம் அளிக்கக் கூடிய சொற்கள் எப்போதும் பயனளிக்கவே செய்கின்றன.

தகவல் தொழில்நுட்ப த்துறையில் விற்பன்னரான நீங்கள் சமூக சேவைக்கான இந்த அரும்பெரும் துறையை எவ்வாறு தெரிவு செய்தீர்கள். அதுபற்றி சற்று விரிவாக எம் முடன் பகிர்ந்துகொள்ள முடியுமா?

  பெங்களூரு நகரில் நான் கணிப்பொறி யியலாளனாக பணி புரிந்த காலத்தில் ஒரு அமைப்பின் சமூக சேவைப் பிரிவில் இணைந்திருந்தேன். சமூகத்தில் கீழ்த்தட்டு மக்களின் குழந்தை களுக்கு உதவி செய்யும் அந்த பணியில் பள்ளிக் குழந்தைகளுக்கு உற்சாகமும் தன்னம்பிக்கையும் ஊட்டும் வகுப்புகளை எடுக்கும் வேலை கொடுக்கப் பட்டது எனக்கு. வாரம் செல்லச் செல்ல அடுத்த வகுப்பை எதிர்நோக்கி அந்தக் குழந்தைகள் எனக்காகக் காத்திருந்ததும், நான் அவர்களுக்காக காத்திருந்ததும் நடந்தது. ஏதோ ஒரு வகுப்பில் அவர்களது வாழ்வில் ஏற்படும் மாற்றங்கள் ஒரு பெரிய போதையைவிட ஆழமான ஓர் உணர்ச்சியை என்னுள் ஏற்படுத்தியது. (நாங்கள் இவற்றை ‘மலர்ச்சித் தருணங்கள்’ என்று சொல்வது வழக்கம்). ‘இதுதான் நாம் செய்யவேண்டியது!’ என்று ஒரு உந்துதல் உள்ளே வந்தது.

மலர்ச்சி வளர்ச்சியை பற்றி எம்முடன் பகிர்ந்துகொள்ள முடியுமா?

ஒரு மனிதன் உடல் – உள்ளம் – உணர்ச்சி – உள்ளறிவு – உயிர் என்று 5 சங்கதிகளால் ஆனவன். 5 கட்டமைப்பினால் உருவாக்கப்பட்ட மனிதன் இந்த ஐந்திலும் சரியாக வளர்கிறானா என்றால் இல்லை. சிலருக்கு உடலும் உள்ளமும் நல்ல வளர்ச்சி பெற்று நிற்கின்றன. ஆனால் உணர்ச்சியில் வளராமல் மொட்டாகவே நிற்கிறார்கள், குழந்தையாகவே நிற்கிறார்கள். இது மொத்தத்தையும் பாதித்து விடுகிறது. ஒரு மனிதன் இந்த 5 சங்கதிகளிலும் வளர்ந்து மொட்டாக நிற்காமல் ‘மலர்ச்சி’ பெற வேண்டும். இதை செய்ய உதவுவது ‘மலர்ச்சி’.

மலர்ச்சியின் மூலம் வாழ்வியல் பயிற்சிகளை எடுத்து சக மனிதனுக்கு மலர்ச்சியும் வளர்ச்சியும் தர முயல்கிறோம். ‘வளர்ச்சி’ என்பது சுயமுன்னேற்ற இதழ். இக்கால மனிதன் தன்னை எல்லா முறை களிலும் வளர்த்துக்கொள்ள உதவும் ஒரு தமிழ் மாத இதழ். 

எப்போதும் ஒரு மனிதன் தன்னை  மகிழ்ச்சியாக வைத்துக்கொள்ள  என்ன செய்ய வேண்டும்?

 இருப்பதை ஏற்றல்! – இதுதான் வழி.  இருப்பதை முதலில் ஏற்றுக்கொண்டு அதன் பின்னரே வேறு என்ன செய்யலாம் என்று சிந்திக்க வேண்டும்.

இத்துறையில் உங்களது அனுபவம் மற்றும் இதுவரை காலமும் நீங்கள் இதில் அடைந்த வெற்றிபற்றி எம்முடன் பகிர்ந்து  கொள்ள முடியுமா?

மலர்ச்சி என்பது மனித மனங்களோடு, மக்களோடு இணைந்து பயணிப்பது. உன்னதமானது. இங்கே இலங்கையில் நடந்த அனுபவத்தையே சொல்கி

றேனே. சென்ற முறை கொழும்பில் பம்பலப்பிட்டி யில் நடந்த நிகழ்ச்சியின் இறுதியில் ஒரு பெண்மணி மேடைக்கு வந்து, ‘நான் ஒரு இதய நோயாளி. எப்போதும் துயரத்திலும் கவலையிலுமே இருப் பேன். ஆனால், வெகு நாட்களுக்குப் பிறகு உங்க ளால் 2 மணி நேரங்கள் என்னை மறந்து மகிழ்ச்சியாக இருந்தேன். புதுத்தெம்பு வந்துள்ளது. இனி மகிழ்ச்சியாகவே இருப்பேன். நன்றி பரமன்!’ என்று பகிர்ந்து கொண்டார்கள். ‘என்னைப் பற்றி எனக்கு இருந்த தாழ்வுணர்ச்சி போய்விட்டது’ என்று சொல்லி நன்றி சொன்னான் ஒரு தம்பி.  நிறைய அனுபவங்கள் உண்டு. இவையெல்லாம் உன்னதம்தானே. இவைதான் என்னைப் போன்றோரை இயங்க வைக்கிறது.

நன்றி வீரகேசரி - சங்கமம் (15/09/2018)

இலங்கை வரலாற்றில் நிகழ்ந்த முக்கியமான எழுச்சிகளோடு மேலெழுந்த அச்சு ஊடகமே வீரகேசரி. இந்திய விடுதலை இயக்கம், இலங்கைத் தேசிய இயக்கம், தமிழ்த் தேசிய இயக்கம், காலனித்துவச் சூழலில் விசை கொண்ட தமிழ் மறுமலர்ச்சி ஆகியவற்றோடு தோற்றம் பெற்ற இதழ்களுள் வீரகேசரி முக்கியமானது.  “எங்கள் பத்திரிகை” என்று கூறும் மரபு தமிழ்ச் சூழலிலே வளர்ச்சியடைந்தது. “எங்கள் பத்திரிகை” “எங்கடை பேப்பர்” முதலாம் சொல்லாடல்களே வீரகேசரி தமிழ்ச் சமூகத்துக்கு வழங்கி வரும் பங்களிப்பைக் குறியீட்டுப்படுத்தும் என்கிறார் பேராசிரியர் சபா ஜெயராசா. 

வீரகேசரி பத்திரிகை 89ஆவது வருடத்தில் காலடி எடுத்து வைப்பதை முன்னிட்டு சமகால கல்வி, மொழியியல் துறையில் நாட்டம் கொண்ட ஊடகங்களுடன் சிறந்த ஊடாட்டம் கொண்டுள்ள  பேராசிரியர் சபா ஜெயராசா வழங்கிய செவ்வியிலேயே அவர் இதனைத் தெரிவித்தார். 

அவர் வழங்கிய செவ்வியில் மேலும் குறிப்பிட்டுள்ளதாவது,

இலங்கையில் தமிழ் பேசும் மக்களைப் பொறுத்தவரை அவர்களுடைய சமூகக் கட்டமைப்பில் ஊடகங்கள் வகித்த - வகிக்கும் பங்கு எத்தகையது? இது குறித்த உங்களுடைய பார்வை என்ன?

ஊடகம் என்பது சமூக வாழ்வின் குறியீடு, சமூக மாற்றத்தின் குறியீடு. தொடர்பாடல் சமூக வாழ்வின் அச்சாணியாகின்றது. தொடர்பாடலை முன்னெடுக்கும் சாதனமே ஊடகம். ஐரோப்பாவில் நிகழ்ந்த அச்சுப் புரட்சியோடு அச்சு ஊடகம் எழுகோலம் பெற்றது. அச்சுப் பொறி “அச்சு வாகனம்” என்றே ஆறுமுகநாவலரால் அழைக்கப்பட்டது. கருத்தைச் சுமந்து செல்வதால் அது வாகனமாயிற்று. சமூக அடுக்கமைவின் வளர்ச்சியோடு அதன் இயல்புக்கு ஏற்றவாறு ஊடகச் செயற்பாடுகளும் மேற்கிளம்பின. தொடக்க காலத்திலிருந்தே தமிழ் ஊடகங்கள் பன்மைத்துவ இயல்புகளைக் கொண்டிருந்தமை குறிப்பிடத்தக்கது. சமூகமே பன்மை இயல்புகளின் தளமாகின்றது.

பொதுவாக தமிழ் ஊடகங்களின் பங்களிப் பைக் குறிப்பிட்டிருந்தீர்கள். இதில் ஆரம்பம் முதல் வீரகேசரி வழங்கி வந்திருக்கும் பங்க ளிப்பு குறித்த உங்களுடைய பார்வை என்ன?

 இலங்கை வரலாற்றில் நிகழ்ந்த முக்கியமான எழுச்சிகளோடு மேலெழுந்த அச்சு ஊடகமே வீரகேசரி. இந்திய விடுதலை இயக்கம், இலங்கைத் தேசிய இயக்கம், தமிழ்த் தேசிய இயக்கம், காலனித்துவச் சூழலில் விசை கொண்ட தமிழ் மறுமலர்ச்சி ஆகியவற்றோடு தோற்றம் பெற்ற இதழ்களுள் வீரகேசரி முக்கியமானது. சமூக மாற்றத்துக்கான மேற்கூறிய இயக்கங்களை உணர்வுபூர்வமான மொழிக் கோலங்களால் முன்னெடுத்து வந்தமையால் வீரகேசரியை “எங்கள் பத்திரிகை” என்று கூறும் மரபு தமிழ் சூழலிலே வளர்ச்சியடைந்தது. “எங்கள் பத்திரிகை” “எங்கடை பேப்பர்” முதலாம் சொல்லாடல்களே வீரகேசரி தமிழ்ச் சமூகத்துக்கு வழங்கிவரும் பங்களிப்பைக் குறியீட்டுப்படுத்தும்.

இலங்கை சுதந்திரமடைந்தது முதல் சிறுபான்மையினங்கள் ஒடுக்குமுறைக்குள்ளாகி வந்திருக்கின்றன. காலத்துக்குக் காலம் வெவ்வேறு விதமான போராட்டங்களை சிறுபான்மையினர் நடத்தி வந்துள்ளார்கள். இதில் அவர்களை வழிநடத்துவதிலும், அவர்களுடைய குரலை வெளிப்படுத் துவதிலும் வீரகேசரி வழங்கியுள்ள பங்களிப்பை எப்படிப் பார்க் கின்றீர்கள்?

சுதந்திரத்துக்குப் பின்னர் “வாக்குத் திரட்டலோடு” இணைந்த ஆட்சி முறையில் பெரும்பான்மை இனத்தவரது வாக்கு வங்கியை அபகரித்துக் கொள்வதற்கு எதிர்மறையான இன உணர்வையும் இனத்துவேஷத்தையும் தூண்டும் செயற்பாடுகள் விதைக்கப்பட்டன. ஒன்றுபட்டு வாழும் தேசிய உணர்வு அறைகூவலுக்கு உள்ளானது. படிப்படியாக இனத்துவக் கொதிநிலை வளர்ச்சியடையத் தொடங்கியது. அகிம்சை நிலை, பேச்சுவார்த்தை நிலை, விட்டுக் கொடுப்பு நிலை என்ற வகையில் போராட்டங்கள் நிகழ்ந்து முடிவில்லா விரக்தியைத் தோற்றுவித்தன. 

அந்நிலையில், வீரகேசரியானது செய்திகளைக் கையளிக்கும் செயற்பாடுகளோடு மட்டும் நிற்கவில்லை. அதற்கும் மேலான பணிகளை முன்னெடுத்தது. அந்நிலையில் வீரகேசரியில் வெளிவந்த ஆசிரியர் தலையங்க முயற்சிகள் விதந்து குறிப்பிடப்பட வேண்டியுள்ளன. நிதானச் சிந்தனை, புறவயமான அணுகுமுறை, நீதியை வலியுறுத்துதல், சிறுபான்மை இனங்களுக்கு கிடைக்க வேண்டிய வகிபாகத்தை வலியுறுத்துதல், தேசிய நலனில் அக்கறை, ஒடுக்குமுறைகளைத் தகர்த்தல் முதலியவற்றை ஆசிரிய உரையினாலும் வளமான கட்டுரைகளாலும் அறிவிப்புச் செய்தல் வாயிலாகவும் 'வீரகேசரி' வழங்கியது. அந்நிலையில் அரச விளம்பரங்கள் வீரகேசரிக்குக் கிடைக்காத நிலையிலும், சிறுபான்மையிரைப் பாதுகாக்கும் இலட்சியத்தை வீரகேசரி கைவிடவில்லை.

தமிழ் மக்களின் உரிமைப் போராட்டத்தில் தமிழ் ஊடகங்கள் குறிப்பாக வீரகேசரி எடுத்த  நிலைப்பாடு குறித்த உங்களது நிலைப்பாடு என்ன?

 தமிழ் உரிமைப் போராட்டத்தில் வீரகேசரின் நிலைப்பாடு தனித்துவமானது. ஒடுக்குமுறைக்கு எதிரான குரலையும் உணர்வுகளையும் வழங்கும் இதழாக இயங்கியதோடு மட்டும் நின்றுவிடாது, உணர்வு நிலையில் விரக்திடைந்திருந்த சிறுபான்மை மக்களுக்கு உளவியல் நிலைப்பட்டு வலுவூட்டலை முன்னெடுத்தலை வீரகேசரி தளராது மேற்கொண்டு வந்தது. வீரகேசரி உருவாக்கிய “உளவியற் பலம்” கலங்கிய நிலையில் இருந்தோருக்கு நேர்நிலைக் கருத்தேற்ற வலுவாக அமைந்தது.

அரசியல், சமூக விவகாரங்களுக்கு அப்பால் ஈழத்து கலை-இலக்கிய வளர்ச்சியில் வீரகேசரிக்கு தனித்துவமான ஓர் இடம் இருப்பதாக நீங்கள் கருதுகின்றீர்களா? அவ்வாறாயின் எப்படி?

அரசியல் நிலைகளுக்கு அப்பால் வீரகேசரி மேற்கொண்டுவரும் கலை, இலக்கியப் பணிகளும், கருத்தாடற்களம் அமைந்தமையும் முக்கியமானவை. தேசிய இலக்கியம், முற்போக்கு இலக்கியம், மண்வாசனை,  போராட்ட இலக்கியம், பெண்ணிய இலக்கியம் முதலாம் கருத்து வினைப்பாடுகளுக்கு வளமான களமும், தளமுமாக விளங்கியது வீரகேசரி. ஈழத்து நாவல்களை அச்சுவாகனம் ஏற்றியமை வீரகேசரி மேற்கொண்ட பிறிதொரு சாதனை. 'ஈழத்து இலக்கியம்' என்ற அடையாளம் வலுப்பெறுவதற்குரிய ஆக்கங்களை வெளியிட்டமையும், எழுத்தாளர்களை மேலெழச் செய்தமையும் நிலைபேறு கொண்ட வரலாற்றுப் பணிகள்.

அச்சு ஊடகங்களுக்குப் போட்டியாக முதலில் வானொலி, தொலைக்காட்சி என்பன நோக்கப்பட்டன. இப்போது இணையம் மற்றும் சமூக ஊடகங்கள் நோக்கப்படுகின்றன. டிஜிட்டல் யுகம் என்று பேசப்படுகின்றது. இந்தப் போட்டிகளுக்கு மத்தியில் அச்சு ஊடகங்களின் எதிர்காலம் சவால் மிகுந்ததாக இருக்கும் என்ற கருத்து ஒன்றுள்ளது. உங்கள் பார்வை என்ன?

 தொழில்நுட்ப வளர்ச்சி, புதிய ஊடகங்களைத் தோற்றுவிப்பதோடு பழைய ஊடகங்களுக்கு வலுவூட்டியும் வந்துள்ளது. சினிமாவின் வளர்ச்சியோடு நாடகமும், கூத்தும் அழிந்துவிடும் என்று கருதினார்கள். மாறாக அவை மீள் எழுச்சி கொள்ளத் தொடங்கியுள்ளன. தொலைக்காட்சியின் வளர்ச்சி, வானொலியை அழித்து விடவில்லை. பண்பலை ஒலிபரப்புடன் வானொலி மீட்டுருவாக்கம் செய்துள்ளது. இலத்திரன் ஊடகங்களின் வளர்ச்சி அச்சுவழி ஊடகங்களை அழித்து விடவில்லை. சமகாலம் அச்சுவழி நூல்கள் பெருக்கெடுக்கும் காலமாக மாற்றம் பெற்று வருகின்றது. அச்சு வழியான புதிய நாள் இதழ்கள் தோற்றம் பெற்று வருதலை இலங்கையிலே காணக்கூடியதாகவுள்ளது. கடதாசி வழியான செய்தி வாசிப்பு, கணினித் திரை வழியான வாசிப்பைக் காட்டிலும் கூடுதலான உளவியற் சுகத்தைத் தருவதாகக் குறிப்பிடப்படுகின்றது.

இந்தச் சவாலை அச்சு ஊடகங்கள் எவ்வாறு எதிர்கொள்ளலாம்?

 அச்சு ஊடகங்கள் ஏற்கனவே தம்மை வளப்படுத்திக் கொள்ளத் தொடங்கி விட்டன. செய்தி உடனுக்குடன் கைகளுக்கு வந்துவிடுவதால் வளமான மாற்றுச் செயற்பாடுகளை அச்சு இதழ்கள் மேற்கொள்ளத் தொடங்கியுள்ளன. சமகாலம் புனைகதை சாரா எழுத்துக்களின் காலம் எனப்படும் கட்டுரைகள், செய்தி விமர்சனங்கள், திறனாய்வுகள் முதலியவற்றுக்கு ஒப்பீட்டளவில் அச்சு ஊடகங்களையே நாடிச் செல்ல வேண்டியுள்ளது. 

ஏனைய ஊடகங்களுடன் ஒப்பிடும் போது அச்சு ஊடகங்களின் பலமாக நீங்கள் எதனைக் குறிப்பிடுவீர்கள்?

அச்சு ஊடகங்களின் பலம், அவற்றில் வெளிவரும் பதிலீடில்லா ஆக்கங்கள், அச்சு ஊடகங்கள் வாசிப்பு உளவியலில் நெகிழ்ச்சித் தன்மையுடன் கலந்துள்ளன. கடதாசியுடன் வாழ்தலும் கற்றலும் கைவிடப்பட முடியாத நிலையிலேதான் உலகம் நீட்சி கொண்டு வருகின்றது.

சமூகத்தின் கருத்து உருவாக்கத்திலோ அல்லது  ஆரோக்கியமான  இலக்கிய  வளர்ச்சி யைப்பொறுத்த வரையிலோ அச்சு ஊடகங்களை விட மற்றைய ஊடகங்களால் அதிகளவு பங்களிப்பை வழங்கக் கூடியதாக இருக்குமா?

கணினித் திரை வழியான வாசிப்பும் கற்றலும் இன்னமும் சமூகத்தின் அடிநிலை மக்களைச் சென்றடையவில்லை. வசதி படைத்தவர்களை அடிப்படையாக வைத்து நவீன ஊடகச் செயற்பாடுகளைப் பொதுமையாக்கம் செய்வது, விளிம்பு நிலையினரைப் புறக்கணிக்கும் மேலாதிக்கச் செயற்பாடா 

கும். விளிம்பு நிலையினரை மேலெழச் செய்வதிலும், அறிவொளி ஊட்டுவதிலும் ஒளிபடைத்த சமூகமாக உருவாக்குவதிலும் சாமானியர்களின் சாதனமாகிய அச்சு ஊடகங்களே ஒப்பீட்டளவில் வினைத்திறன் மிக்கவை.

நன்றி - வீரகேசரி 06.08.2018

வாரிசு அரசியல்  உலகில் புதிதாக உருவானதொன்றல்ல. மேலைத்தேய நாடுகள் உட்பட வளர்ந்துவரும் நாடுகளிலும் வாரிசு அரசியல் பல நூற்றாண்டுக் கணக்கில் இருந்தே வருகின்றது.  ஆக, ஆச்சரியமான விடயமாக இல்லாதபோதிலும் கடந்த வாரம் தொடர்ச்சியாக  ஊடகங்கள் வாயிலாக பேசுபொருளான விடயமாக "வாரிசு அரசியல்" இருந்தது. அதனை பற்றியே இவ்வார அலசலும் பேசுகின்றது.

உலக அரசியலை எடுத்துக்கொண்டால்,  உலகளாவிய ரீதியில் அதிகாரத்தில் இருக்கும் ஒவ்வொரு தலைவரும் தான் அரசியலிலிருந்து ஓய்வுபெறும் காலத்தில் தன்னுடைய வாரிசுகளில் ஒருவரே இதனைத் தொடர்ச்சியாக கொண்டு செல்வதான கட்டமைப்பை உருவாக்கிகொள்கின்றார். 

 தலைவர்களைத் தெரிவு செய்வது மக்களாக இருந்தாலும் கூட பெரும்பாலும் வாரிசைத் தெரிவுசெய்யும் பங்கில் குறிப்பிட்ட மக்கள் பங்கேற்காமல் இடம்பெறுவதுதான் அதிர்ச்சியையும் ஆச்சரியத்தையும் தந்துவிடுகின்றது. உலக வல்லரசாகத் திகழும் அமெரிக்காவில் அதன்  41ஆவது ஜனாதிபதியாக  ேஜார்ஜ் ஹெர்பெர்ட் வாக்கர் புஷ்  1988 ஆம் ஆண்டு முதல் 1992 ஆம் ஆண்டு வரை பதவியிலிருந்தார். இவரின் பிள்ளை ேஜார்ஜ் வாக்கர் புஷ் அமெரிக்காவின் 43ஆவது ஜனாதிபதியாக 2000 ஆம் ஆண்டு முதல் 2009 ஆம் ஆண்டு வரை பதவியில் இருந்தார். 

 ஆனால், இவர்கள் "அரசியல் முதிர்ச்சியுடனேயே" மக்களால் போட்டியிட்டு தெரிவு செய்யப்பட்டவர்களாக இருந்தமையினால் விமர்சனங்களின்றி மக்கள் மத்தியில் ஏற்றுக்கொள்ளப்பட்டு பிற்காலத்தில்  சிறந்த தலைவர்களாகவும் விளங்கினார்கள். இது ஓர் உதாரணமே.  

குறிப்பாக வளர்ந்துவரும் நாடுகளில்  வாரிசுகளை அரசியலுக்குள் கொண்டு  அணுகுமுறைகள் சமூகத்தின் மத்தியில் வெறுப்புக்களையும் ஏற்படுத்தி விடுகின்றது.

இந்தியாவில், கலைஞர் கருணாநிதியின் வாரிசுகள் அரசியலில் முழுநேரமும் செயற்படுகின்றனர். அவர்களில் கலைஞரின் மறைவின் பின்னர் மு.க.ஸ்டாலின் தி.மு.க. வின் தலைவராக  எந்தவொரு எதிர்ப்புமின்றி தற்போது தெரிவு செய்யப்பட்டுவிட்டார். இந்தத் தெரிவு மக்கள் மத்தியிலோ அல்லது கட்சித் தொண்டர்கள் மத்தியிலோ எந்தவொரு விமர்சனத்துக்கும் உட்படவில்லை என்பது யாவரும் அறிந்ததே. 

 இந்நிலையில் இலங்கையை எடுத்துக்கொண்டால் இதுவரை கால அரசியல் வரலாற்றில் சேனநாயக்க, பண்டாரநாயக்க,  பிரேமதாஸ,  ராஜபக் ஷ, திஸாநாயக்க ஆகியோர் உட்பட பல அரசியல் தலைவர்களின் வாரிசுகள் பரம்பரையாக அரசியலுக்குள் வந்திருப்பதை அவதானிக்கலாம். பண்டாரநாயக்க அரசியலில் ஆரம்பித்து அவரது வாரிசான சந்திரிகாவின் ஆட்சியில் முடிவடைந்தது. எதிர்காலத்தில் அவர் பிள்ளைகளினூடாகத் தொடரலாம். 

அதுபோல, பிரேமதாஸவின் மகன் சஜித் பிரேமதாஸ, காமினி திஸாநாயக்காவின் மகன் நவீன் திஸாநாயக்க,  ராஜபக் ஷவின் மகன் நாமல் மாத்திரமல்லாது சக குடும்பத்தினரும் ஆட்சி அதிகாரத்தைத் தக்கவைத்துக்கொள்ளப் போராடும்  பரம்பரை அரசியல் முன்னெடுப்பும் இடம்பெற்று வருவதை அவதானிக்கலாம்.

அது மட்டுமன்றி அரசியலில் இருக்கும் ஏனைய சில அமைச்சர்களும் தங்களது வாரிசுகளையே அடுத்த நிலைக்கு நிறுத்துகின்றனர். இதனை நாம் கண்கூடாக அவதானித்துகொண்டே இருக்கின்றோம்.   தற்போது பாராளுமன்றத்தில் 12 பெண் உறுப்பினர்களில் 9 பேர் அரசியல்வாதிகளின் உறவுகளாகக் காணப்படுகின்றனர்.  பாராளுமன்றத்தில் 225 பேரில் 98 பேர் அரசியல் வாரிசுகளாக இருக்கின்றனர். 

 தேசிய ரீதியிலும் வடக்கு, கிழக்கு, மலையகம் என சகல மாவட்டங்களிலும் வாரிசு அரசியல் முறை என்பது வளர்ந்து கொண்டே வருகின்றது.  இங்கு மலையகத்தில் உள்ள ஒரு சில விடயங்களை சுட்டிக்காட்டுவோமாயின் கடந்த இரு வாரங்களுக்கு முன்னர் இலங்கைத் தொழிலாளர் காங்கிரஸின் உதவிச் செயலாளராக ஜீவன் தொண்டமான் தெரிவு செய்யப்பட்டார். இளைஞரான இவர் தெரிவு செய்யப்பட்டமை வரவேற்கத்தக்க விடயமாயினும் இதனால் சில சலசலப்புகள் ஏற்பட்டமை பற்றியும் கவனம் செலுத்த வேண்டியுள்ளது.

மலையக மக்கள் முன்னணியின் பிரதி செயலாளராக அமரர் சந்திரசேகரனின் மகள் அனுஷியா சந்திரசேகரன் திடீரென தெரிவுசெய்யப்பட்ட தருணத்தில் கட்சிக்குள் இத்தகைய  சலசலப்புக்கள் வந்தன. இளைஞர்களாக, துடிப்பாக இருக்கின்றார்கள். தமது வாரிசுகளை அரசியலுக்குள் கொண்டுவருவது வரவேற்கத்தக்க விடயமாயினும் அவ்வாறு உள்வாங்கப்படுகின்றவர்களுக்கு எந்தளவு அரசியல் அனுபவம் இருக்கின்றது என்பது பற்றிய தெளிவு அவசியம். பரம்பரை பரம்பரையாக இருக்கின்றோம் என்பதற்காக திடீரென்று ஒருவரைக் கொண்டு வந்து நிறுத்தும் போது கட்சியிலோ அரசியலிலோ மாற்றம் ஏற்படுத்தப்பட்டுவிடுமா?

இ.தொ.கா.வின் செந்தில் தொண்டமான் மற்றும் உதவிச் செயலாளர் ஜீவன் ஆகியோர் மாத்திரம் அரசியல் வாரிசுகள் இல்லை. பொதுச் செயலாளராக தெரிவு செய்யப்பட்டிருக்கும் அனுஷா சிவராஜாவும் வாரிசு வழி வந்தவரே. தொண்டமான் குடும்ப உறவினரான இவரது தந்தை அண்ணாமலை இதேபோன்றே திடீரென 1965 ஆம் ஆண்டளவில் அரசியலுக்கும் பாராளுமன்றத்துக்கும் நியமிக்கப்பட்டார்.

அவரது மரணத்துக்குப்பின் அவரது மகன் கதிரேசனுக்கு வாய்ப்பளிக்கப்பட்டது. அவர் மத்திய மாகாண சபை உறுப்பினராகவும் இருந்தார். இப்போது ஐக்கிய தேசிய கட்சியின் தொழிற்சங்கமான இலங்கை தேசிய தோட்டத் தொழிலாளர் சங்கத்தில் முக்கிய பொறுப்பில் உள்ளார். 

மறுபுறத்தில் தொண்டமான் குடும்பத்திலிருந்து சௌமியமூர்த்தி தொண்டமான் உயிருடன் இருக்கும்போதே அவரது மகன் இராமநாதன் தொண்டமான் அரசியலுக்கு அறிமுகப்படுத்தப்பட்டு அவர் மத்திய மாகாண கல்வி அமைச்சராகவும் செயற்பட்டார். அவருக்குப்பின் அவரது பேரனான ஆறுமுகன் தொண்டமானையும் அறிமுகம் செய்தார். 

ஆறுமுகன் அவரது சகோதரி மகன் செந்தில் தொண்டமானை அறிமுகம் செய்து அவர் இப்போது ஊவா மாகாண அமைச்சராகவும் உள்ளார். இப்போது அறிமுகப்படுத்தப்பட்டிருக்கும் ஜீவன் தொண்டமான் ஐந்தாம் தலைமுறை குடும்ப உறுப்பினராக கட்சியில் பதவி பெற்றுள்ளார். 

இப்போதைய நிலையில் தலைவராக ஆறுமுகன் தொண்டமான்,  உதவிச் செயலாளராக அவரது மகன், பொதுச் செயலாளராக அவரது பரம்பரை உறவினர் என ஒருசேர உயர்பீடத்தில் இருக்கும்போது கட்சிக்காகவே  காலங்காலமாக உழைத்து அதனையே நினைத்து உருகி தமது காலத்தை அதற்குள்ளேயே செலவளித்த  கட்சியின் ஏனைய சிரேஷ்ட உறுப்பினர்களின் மனநிலை என்னவாக இருக்கும்? அவர்கள் எப்போது கட்சியின் தலைவராக அல்லது செயலாளராக வருவது என்பது மிகப்பெரிய கேள்வி. இதற்கு மத்தியில் "ஜீவனைக் கொண்டுவந்ததால் என்ன?" என்னும் கேள்வியை தலைவர் ஆறுமுகன் எழுப்பியுள்ளார். அவரிடம் மீண்டும் சில கேள்விகளை முன்வைக்க வேண்டியுள்ளது. 

75 ஆண்டுகால இ.தொ.கா. வரலாற்றில் பெரும்பாலான காலத்தை தன்வசம் வைத்திருந்த பெருந்தலைவர் சௌமியமூர்த்தி தொண்டமான் மக்களுக்கு ஆற்றிய பணியை, அவர் காத்த பெருமையை, அவருக்கு பின்னர் இ.தொ.கா. வால் ஆற்றுவதற்கோ தக்கவைக்கவோ முடிந்துள்ளதா? அவரது உரைகள் போன்று பாராளுமன்றத்தில் உரைகளைக் கேட்க முடிகிறதா? அல்லது முகத்தையேனும் காண முடிகிறதா? அடுத்த தலைமுறைக்கும் இந் நிலைதான் தொடரத்தான் வேண்டுமா?

நன்றி வீரகேசரி - 06.09.2018

3 தசாப்தத்தைக் கடந்து ஒரு நிர்மலாஞ்சலி  நாட்டிய பள்ளியை  நடத்திவரும் நீங்கள் இதுவரையில் எதிர்கொண்ட சவால்கள் எவ்வாறானது என்பது பற்றி எம்முடன் பகிர்ந்துகொள்ள முடியுமா?

பல சவால்கள் இன்னல்கள் என்று அனுபவித்துள்ளேன். ஆனால் என்னுடைய தணியாத தாகம், - விடாமுயற்சி – நாட்டியத்தின்மேல் உள்ள பிரியம், - என்னுள் இருக்கும் இனம்புரியாத சக்தி இவையெல்லாம் சேர்ந்து எதுநேர்ந்தாலும் முகம்கொடுத்து மன சக்தியுடன் எனது நடனப் பயணத்தை தொடர ஒருவிதத்தில் இந்த சவால்கள் என்னை நடனத்துறையில் முன்னோக்கிச் செல்ல வழியமைப்பதாகவே அமைகின்றது என்றுகூட சொல்லலாம். 

இதுவரையில் பல வகையான நாட்டிய நாடகங்களை நடத்தி வந்துள்ளீர்கள். அவற்றுள் உங்கள் மனதை ஈர்த்த நிகழ்வுகளைப் பற்றி எம்முடன் பகிர்ந்துகொள்ள முடியுமா?

ஆம், - இதுவரையில் 25 நாட்டிய நாடகங்கள் - அதாவது தனி - குழு என்று மேடையேற்றியுள்ளேன். என்னுடைய முதல் படைப்பு 1985இல் 'தேவ கற்பனைகள்'. பாரம்பரிய இந்துமதத் தத்துவங்களைத் தெளிவுபடுத்த – தெய்வங்களைத் துதிக்க கையாளப்பட்ட கலைவடிவமே பரதநாட்டியம்.  இருந்தும் இதைக்கொண்டு எதையுமே உணர்த்த முடியும் என்பதால் கத்தோலிக்க மத சம்பவங்களையும் தத்துவங்களையும் பரதநாட்டியத்தில் அமைக்கத் தொடங்கினேன்.

 இங்கு எனது தந்தை பாடல்கள் எழுதி ஊக்குவித்தார். தாயார் உடைகள் அமைத்தும் உடுத்திவிட்டும் உறுதுணையாக இருந்தார். இந்த முயற்சியில் எழுந்தவைகள் பல. தொடர்ந்தும் சமூக நாட்டிய நாடகங்கள், -புராண இதிகாச சம்பவங்கள், - ஆங்கில நாவல்களைத் தழுவிய நாட்டிய நாடகங்கள், - சிறுவர் கதைகள்... இப்படி பல முயற்சிகளில் ஈடுபட்டுள்ளேன். 

ஒவ்வொரு படைப்பும் ஒரு பிரசவம்போல்தான். இதில் நான் எதையென்று பிரித்துச் சொல்வது? ஓவ்வொரு தடவையும் புது படைப்பை உருவாக்கும்போது மாணவருடன் சேர்ந்து அவர்களுடன் ஒன்றி கதையை விளக்கி தகுந்த பாத்திரங்களை தேர்ந்தெடுத்து அவர்களை வழிநடாத்தி நடனப் பயிற்சியில் ஈடுபடுத்துவதே அலாதியான சாதனைதான் 

டிஜிட்டல் யுகத்தில் பரதத்தின் போக்கு எவ்வாறுள்ளது?

நல்ல கேள்வி – வீதிகளிலும் கோவில்களிலும் தீப்பந்த ஒளியிலும் விளக்கொளியிலும் நடந்த நடனம் பின் மேடையில் மின் ஒளியுடன் ஆரம்பித்து தற்போது விஞ்ஞான வளர்ச்சியுடன் பலவித வித்தைகளை மேடையில் அமைத்துத்தர வல்ல ஒளிநிபுணர்களால் மேடைகள் அமைப்பதையும் கண்டுள்ளோம். இப்போது வீடியோ வோல் மூலம் பின்புறக் காட்சிகளை அமைத்துக் காட்டுகிறார்கள்.
இவ்வாறான காட்சிகள் சிங்கப்பூர், மலேசியா போன்ற நாடகக் கம்பனிகளிலிருந்து இங்கு கொண்டுவரும் நாட்டிய நாடகங்களுக்கு கொழும்பிலும் சில விற்பன்னர்களால் கையாளப்படுவதை நான் காண்கின்றேன். ஏன் - நான்கூட தேவையின் நிமித்தம் இதைக்கையாண்டுள்ளேன். இது பார்வையாளர்களுக்கு மகிழ்வைத்தர வல்லதுதான். ஆனால் இவ்வித்தைகளின் மூலம் எமது நடன ஆக்கத்தின் தரம் குன்றாது பாதுகாக்க வேண்டியது ஆசானின் கடமையாகும். 

பரதம் கற்பவர்களின் ஈடுபாடு தற்போது வெகு குறைவாகக்  குறைந்து வருகின்றது. இது பற்றி உங்கள் கருத்து என்ன?

உண்மைதான். ஆனாலும் இந்த தெய்வீகக் கலை எல்லோருக்கும் கிட்டும் ஒன்றல்ல. அப்படியே 100 பேர் கற்றாலும் அதில் இருவரோ மூவரோ மட்டுமே ஒளிவிட்டு பிரகாசிக்கிறார்கள். 

பாடசாலை / உயர்கல்வி மட்டத்தில் பரதக்கல்விக்கான முக்கியத்துவம் எவ்வாறிருக்கின்றது என்பது பற்றிக் கூற முடியுமா?

ஆம், - பாடசாலைகளில் பரதக்கல்வி  சாதாரண, உயர்தரம் வரை இருந்தபோதும் முக்கியமாக கொழும்பைப் பொறுத்தவரை இதை உயர்தரம் வரை தொடர்பவர்கள் மிகக்குறைவு என்றே கூறவேண்டும். ஆனால் வடமாகாணம், மத்திய மாகாணம், ஊவா மாகாணம் இப்பிரதேசங்களில் கூடுதலான மாணவர்கள் பரதக்கலையைக் கற்று தேர்ந்து பல்கலைக்கழகம் செல்லும் வாய்ப்பினைப் பெறுகிறார்கள். இந்தியாவைப் போலவே இங்கும் பரதநாட்டியம் நிகரில்லா அந்தஸ்துடன் உலா வருகிறது. வாழ்க நடனக்கலை. வாழ்க நடனப் பிரியர்களே. வாழ்க நடன ஆசான்களே. 

32ஆவது ஆண்டை இம்முறை கொண்டாடவுள்ள நீங்கள்... புதிதாக எவ்வாறான நிகழ்வை வழங்கவுள்ளீர்கள். ?

ஓம் புதிதல்ல – பழையவை. மலரும் நினைவுகள். இத்தனை ஆண்டு காலமாக அமைத்த நடனங்களுள் மனதை ஈர்த்த சாஸ்திரிய கிராமிய நடனங்களுடன் 1994இல் மேடையேற்றி பலரின் பாராட்டைப் பெற்று 1999ஆம் ஆண்டில் திரு வி. பி. தனஞ்சயன் - சாந்தா தனஞ்சயன் முன் மேடையேறி பாராட்டைப்பெற்ற – என் மனதை ஈர்த்த – தற்போது நான்காவது தடவையாக மேடையேறும் 'வெண்பனியாளும் ஏழு குள்ளர்களும்' எனும் - சிறுவர் கதையைத் தழுவிய அற்புதமான ஓர் படைப்பை நாட்டிய நாடகமாகத் தரவுள்ளார்கள் நிர்மலாஞ்சலி நடனக் கலையக மாணவர்கள். அதில் விசேடம் என்னவென்றால் 1994இல் மானாக பாத்திரம் ஏற்றவர் தொடர்ந்து வெண்பனியாளாகவும் அதைத்தொடர்ந்து இம்முறை பொல்லாத சித்தியாகவும் நடன விருந்தளிக்கிறார். 

ஏன்? மொழிபெயர்ப்பு நாடகத்தை நாட்டிய நாடகமாக எடுத்துள்ளீர்கள்? இதில் எத்தனை பேர் பங்குபற்றவுள்ளனர். இது பற்றிய விரிவான விளக்கம் ஒன்றை தர முடியுமா?

'பிறநாட்டு நல்லறிஞர் சாத்திரங்கள் தமிழ்மொழியில் மொழிபெயர்த்தல் வேண்டும் என்றார் பாரதியார்.  நான் பாரதிமேல் மிகுந்த பக்தி கொண்டவள். ஆகவேதான் அண்மையில் 'பாரதிக்கு பரதாஞ்சலி' என்று விழாவொன்றும் எடுத்துள்ளேன். இது கட்டுக்கதையாக இருப்பினும் சிறந்த தத்துவம் கொண்டது. பேராசை பெரு நட்டம் என்பதனை காட்டுகிறது.

 இத்தகைய கதைகள் சிறார்களுக்கு அறிவு ஊட்டுவதுடன் அகமகிழ்ச்சியையும் கொடுக்கிறது. வரண்டுபோன இன்றைய உலகத்திற்கு – மிருகத்தனம் ஓங்கி வளரும் மக்கள் உள்ளங்களுக்கு – ஆத்தி சூடியும் திருக்குறளும் காணாதவர்க்கு இத்தகைய நிகழ்வுகள் கண்டிப்பாக வேண்டும். இதில் 36 பெண்கள் பங்குபற்றுகின்றனர். 

இம்மாத இறுதியில் நடைபெறவுள்ள கலாலயாவின் ஆண்டு விழாவில் 'பாஞ்சாலியின் சபதம்' விசேட நாட்டிய நாடகம் ஒன்றை வழங்கவுள்ளதாக அறிந்தோம். இது பற்றி எம்முடன் பகிர்ந்து கொள்வீர்களா?

ஆம், - இசை நடனப் பள்ளி கலாலயா தனது 70ஆவது ஆண்டு நிறைவினை இவ்வருடம் கொண்டாடவுள்ளது. இப்பள்ளியின் ஆசிரியராக பணியாற்றிவரும் என்னிடம்  'சிவகாமியின் சபதம்' கல்கி ரா. கிருஷ்ணமூர்த்தியின் கதையை ஓர் நாட்டிய நாடகமாக அமைத்துத் தர முடியுமா என்று இலங்கை தமிழ் மாதர் சங்கம் என்னைக் கேட்டபோது நான் அவர்களின் வேண்டுதலை ஏற்றுக்கொண்டேன். காரணம் என் தந்தை இருக்கிறார் - அவர் பிரதியை எழுதுவார் என்ற நம்பிக்கையில் பிரதி எழுதப்பட்டது. அருணந்தி ஆரூரன் சிறப்பாக இசை அமைத்துள்ளார். எனது நடனப்பள்ளி மாணவர்களுடன் நடன விற்பன்னர்கள் சிலரையும் சேர்த்து நானும் அவர்களுடன் இணைந்து ஓர் அளப்பரிய அழியா படைப்பை செப்டெம்பர் மாதம் 30ஆம் திகதி பிஷப்ஸ் கல்லூரி அரங்கில் தரவுள்ளோம். 

இந்த நாட்டிய நாடகத்தில் நீங்கள் கையாண்டுள்ள நவீன யுக்தி எத்தகையது?

எனது ஆக்கங்களில் நான் அதிகமாக உண்மை உருவங்களையோ காட்சிகளையோ புகுத்தி சம்பவங்களை நம்பவைக்க முயலுவதில்லை. நவீன உலகத்திற்கு பின்னணி தேவையா நம்புவதற்கு? மனிதர்களையே காட்சிப் பொருள்களாகக் கொண்டு ஒலி, ஒளி நுட்பங்களால் எண்ணத் தாக்கங்களை ஏற்படுத்துகிறேன் 

இக்கதையின் சுருக்கக்குறிப்பு மற்றும் இதற்கு உதவியவர்கள், இந்நாட்டிய நாடகத்தில் நடிப்பவர்கள் பற்றி எம்முடன் பகிர்ந்துகொள்ள முடியுமா?

இது 7ஆம் நூற்றாண்டில் தென்னிந்தியாவில் அரசியல் பிணக்குகளின் மத்தியில் நடந்த ஓர் காதல் ஓவியம். இதற்கு உதவுபவர்கள் எழுத்தாளர்,- இலங்கை மாதர் தமிழ் சங்கத்தவர்கள் இன்னும் பலர். நாடகத்தில் சில முக்கிய ஆண் கதாபாத்திரங்களுக்காக யாழ்ப்பாணத்திலும் கொழும்பிலுமாக தொழில் நுட்பக் கலைஞர்களை தேர்ந்தெடுத்துள்ளேன். 

இத்துறையில் தொடர்ச்சியாக புதுமைகளை நீங்கள் படைப்பதற்கு உங்களுக்கு இருக்கும் உந்து சக்தி யார்? இவ்வாறான படைப்புக்களை வழங்க வேண்டுமென்று எண்ணுவதற்கான காரணம் என்ன?

தம்பிமுத்துப் புலவர் - சுவாமி ஞானப்பிரகாசர் அடிகளார் அவர்களின் வழியில் உதித்த எனது  தந்தை திரு ஐ.டி பெனடிக்ட். இவர் என்னை பாடசாலைக் காலத்தில் நடைபெறும் பாடசாலைகளுக்கிடையிலான பேச்சுப் போட்டி களிலும் தனி நடிப்புகளிலும் பங்குபெறச்செய்து எப்போதும்  நான் முதல் இடத்தைப்பெற என்னை வழிநடாத்திய என் ஆசான். 

எப்பொழுதும் சமூக புராண சாஸ்திரிய சிறந்த வேற்றுமொழிக் கதைகளை தமிழில் மொழிபெயர்த்து  நடனங்களாக அளிப்பதில் அலாதியான மனமகிழ்ச்சி அடைகிறேன். உன்னதமான எமது பரதக்கலை மூலம் மனதில் பதியக்கூடிய நற்செய்திகளைத் தரவல்ல சிறப்புமிக்க நாட்டிய  நாடகங்களை நெறியாழ்கை செய்து மேடையேற்றுவதில் மன நிறைவு காண்கிறேன். 

எதிர்காலத்தில் உங்களது படைப்புக்கள் எவ்வாறா னதாக இருக்கும்?

சமூகத்திற்கு நல்ல அறிவு புகட்டக்கூடிய – தெளிவு தர வல்ல தரமான படைப்புகளை உருவாக்க என் உள்ளம் ஆவல் கொண் டுள்ளது. 

நன்றி வீரகேசரி - சங்கமம் (01/09/2018/)